شمع/ تپاند زُهاد

تپاند زُهاد

شمعه چي بله شي رڼا زیږوي
مخ زما د یار هسي ښکلا زیږوي

د یار په خوله کي مي ګلاب ولیدي
هره خبره  یي  بورا زیږوي

د جانان مینه مي پرزړه پاتي ده
مینه یي تل دزړه ژړا زیږوي

د دُنیا تور مخونه نه ګورمه
هغه مخ ګورم چي ځلا زیږوي

د ځوانۍ هیلي مي شهیدي شولي
د شهید وینه کربلا زیږوي

لمر چي را پورته شي جهان ښکلي کړي
توري تیاري خو تل بیګا زیږوي

تپاند زُهاده” بس کړه نور شعرونه
شعرونه تل دزړه وینا زیږوي



تبصره وکړه

ستاسو ایمیل ادرس به هیڅ کله نشر نه شي.