رنګ دې ولې داسې زيړ شو لکه پاڼه؟

اسدالله غيرت / پکتيا

رنګ دې ولې داسې زيړ شو

لکه پاڼه !

وايه څه درباندې وشول ؟

د وطن اوسني خال ته ورخطا يې ؟

کنه خپلې بې وسۍ ته په ژړا يې ؟

رنګ دې ولې داسې زيړ شو د زړه سره ؟

راته وکړه نن صفا صفا خبره

د چا سترګو به په زړه نه وې ويشتلی ؟

دا چې ښکارې د پخوا پرتله غلی

ستا په شونډو خاموشي زغملی نه شم

ستا دا ګونګه زندګي زغملی نه شم

ستا په مخ کې د خفګان ژورې نښې

که باور کوې بيخي زغملی نه شم

رنګ دې ولې داسې زيړ شو لکه پاڼه ؟

وايه څه درباندې وشول ؟



تبصره وکړه

ستاسو ایمیل ادرس به هیڅ کله نشر نه شي.