د میرمنو په اړه د رسول اللهﷺ وصیت

حامد افغان

مقدام بن معدي کرب رضي الله عنه وایي: رسول الله صلی الله علیه وسلم خلکو ته د خبرو لپاره ودرېدی، د الله حمد او ثنا یې وويله، بیا یې وفرمایل: الله تبارک وتعالی تاسو ته د ښځو په اړه د ښو وصیت کوي، الله تاسو ته د ښځو په اړه د ښو وصیت کوي، الله تاسو ته د ښځو په اړه د ښو وصیت کوي، الله ستاسو د مندو، ستاسو دلوڼو، ستاسو د خوندو، ستاسو د ترندو او ستاسو د خاله ګانو په اړه د خیر وصیت درته کوي. د کنیسه والو (عيسايي عالمانو) یوه سړي به ښځه نکاح کړه، هغه به نه پوهېدی چې هغې کې یې خیر شته، نو دوی دواړو به یوه بل نه نفرت نه کاوه تر څو به سپينږيري او مړه شول. یعني تر مرګه به یې مینه سره لرله او له یوه بل نه به نه بېلیدل.

عَنِ الْمِقْدَامِ بْنِ مَعْدِي كَرِبَ ، أَنّ النَّبِيَّ صَلَّى اللَّهُ عَلَيْهِ وَسَلَّمَ قَامَ فِي النَّاسِ فَحَمِدَ اللَّهَ وَأَثْنَى عَلَيْهِ ثُمَّ قَالَ : إنَّ اللَّهَ تَبَارَكَ وَتَعَالَى يُوصِيكُمْ بِالنِّسَاءِ خَيْرًا , إِنَّ اللَّهَ يُوصِيكُمْ بِالنِّسَاءِ خَيْرًا , إِنَّ اللَّهَ يُوصِيكُمْ بِالنِّسَاءِ خَيْرًا ، إِنَّ اللَّهَ يُوصِيكُمْ بِأُمَّهَاتِكُمْ ، وَبَنَاتِكُمْ ، وَأَخَوَاتِكُمْ ، وَعَمَّاتِكُمْ ، وَخَالاتِكُمْ ، إِنَّ الرَّجُلَ مِنْ أَهْلِ الْكَنَائِسِ لَيَتَزَوَّجُ الْمَرْأَةَ وَمَا يَعْلَمُ مَا لَهُ بِهَا مِنَ الْخَيْرِ , فَمَا يَرْغَبُ وَاحِدٌ مِنْهُمَا عَنْ صَاحِبِهِ حَتَّى يَمُوتَا هَرَمًا. رواه الطبراني في المعجم الکبیر

رسول الله صلی الله علیه وسلم درۍ ځله خلکو ته تکرار کړه چې الله تبارک وتعالی له ښځو سره د ښېګڼي په اړه توصيه درته کوي، بیا یې نورې اړوند خپلوانې لکه: مندې، لوڼه، خوندې، ترندې او خاله ګانې په تفصیل سره بیان کړې، چې الله له دوی سره د ښه چلند کولو امر درته کوي، وروسته یې د پخوانیو عيسايي عالمانو د ژوند، میني او ښو ازدواجي اړیکو ته نغوته کړې ده چې هغوی به تر مرګه د میني پالنه کوله. او په دې کې خپل امت ته دا مهم پیغام مطلوب دی چې له خپلو میرمنو سره ښه چلند وکړئ او له هغوی سره تر مرګه مینه وپالئ.



تبصره وکړه

ستاسو ایمیل ادرس به هیڅ کله نشر نه شي.