دیني، سیرت او تاریخ

آسانه نېکيانې (شپږمه برخه)

دکتور کفايت الله (وردګ)

دواړه لاسونه له خير نه ډک

له حضرت ابي اوفى رضی الله عنه څخه روايت دى هغه فرمايي رسول الله صلی الله علیه وسلم ته يو کس راغلو ورته يې وويل : يا رسول الله صلی الله علیه وسلم زه نشم کولى قرآن زده کړم ماته داسې څه شى را وښيه چې زما بس شي رسول الله صلی الله علیه وسلم ورته وفرمايل داسې وايه سُبْحَانَ اللَّهِ وَ الْحَمْدُ لِلَّهِ وَ لَا إِلَهَ إِلَّا اللَّهُ وَاللَّهُ أَكْبَرُ ، وَ لَا حَوْلَ وَلَا قُوَةَ إِلَا بِاللهِ کوچي وويل : دغسې او بيا يې دواړه لاسونه سره بند کړل بيا يې وويل : دا خو د الله جل جلاله لپاره شول زما لپاره څه شى شول؟ رسول الله صلی الله علیه وسلم ورته وويل داسې وايه : اللهم اغُفِرْ لِي وَارْحَمْنِيْ وَعَافِنِيْ وَارْزُقْنِيْ وَاهْدِني کوچي دا واخيستل او خپل لاسونه يې سره بند کړل رسول الله صلی الله علیه وسلم وفرمايل : او دې سړي خپل لاسونه په خير باندې ډک کړل . اسناده جید

په جنت کې نيالګي

له حضرت ابي هريره رضی الله عنه څخه روايت دى هغه فرمايي رسول الله صلی الله علیه وسلم زما په خوا کې تېرېدو ما نيالګى کېښودو ماته يې وويل : اې ابا هرېره څه نيال کوې؟ ما ورته وويل دا يو نيالګې مې دى دا نيال کوم رسول الله صلی الله علیه وسلم راته وفرمايل: زه درته داسې نيالګى ونه ښيم چې لدې نه درته غوره وي؟ حضرت ابو هريره رضی الله عنه فرمايي ما ورته وويل : هو يا رسول الله صلی الله علیه وسلم راته وښايه رسول الله صلی الله علیه وسلم راته وويل : ووايه سُبْحَانَ اللهِ الْحَمْدُ للهِ لَا إِلَهَ إِ لَّا اللهُ اللهُ أَكْبَرُ الله جل جلاله به د هر يو په بدل کې درته په جنت کې ونه نيال کوي . صححه الالباني

غوره اذکار

رسول الله صلی الله علیه وسلم فرمايي : سُبْحَانَ اللَّهِ نيمه تله ده (چې د عملونو د تول په تله کې کېښودل شي نيمه ډکوي)

او الْحَمْدُ لِلَّهِ يې ډکوي او اللَّهُ أَكْبَرُ د زمکې او اسمان په مينځ کې ساحه ډکوي. سنن الترمذي

جنت ته ننه ايستونکي خصلتونه

رسول الله صلی الله علیه وسلم فرمايي : (حديث اوږد دى زه يې صرف ترجمه را نقل کوم)

ترجمه : دوه خصلتونه او يا دوه عادتونه دي هغه کوم مسلمان نه ساتي مګر جنت ته به ننوزي هغه اسانه دي او عمل کوونکي ورباندې لږ دي لس ځله سُبْحَانَ اللَّهِ وايه لس ځله الْحَمْدُ لِلَّهِ وايه لس ځله اللَّهُ أَكْبَرُ وايه د هر مانځه نه وروسته دا په ژبه باندې يو نيم سل دي (دپنځو مونځونو وروسته) او يو نيم زر دي په تله کې (د يوې نيکي ثواب يو په لسه ورکول کيږي) دري دېرش ځله سُبْحَانَ اللَّهِ وايه دري دېرش ځله الْحَمْدُ لِلَّهِ وايه او څلودېرش ځله اللَّهُ أَكْبَرُ وايه (عطاء د حديث راوي ته نه دي په ياد چې کوم يو يې څلور دېرش ياد کړل) دا وايه کله چې څملاستې نو دا په ژبه باندې سل دي (33+33+34=100) او په تله کې دا زر دي (د يوې نيکي اجر يو په لسه دى) په تاسې کې به څوک داسې وي چې په ورځ کې دوه نيم زره ګناهونه به کوي صحابه وو ورته وويل : يا رسول الله دا ولې اسانه دي او عمل کوونکي ورباندې لږ دي؟ (دا خو سخت کار نه دى نو تاسې ولې وفرمايل چې ډېر لږ خلک پدې عمل کوي؟) رسول الله صلی الله علیه وسلم وفرمايل : په تاسې کې چې يو څوک د مانځه نه فارغ شي نو شيطان ورته راشي فلانى فلانى کار ور په زړه کړي نو (په هغه کارونوپسې) پاڅيږي او دا کلمې ونه وايي کله چې انسان څملي (تر وېده کېدو وړاندې) شيطان ورته راشي او دى ويده کړي مخکې لدې چې دا کلمې ووايي (راوي فرمايي) ما رسول الله صلی الله علیه وسلم وليدو چې دا يې په لاس باندې سره شمېرلې . صحیح الجامع

د ګناهونو مغفرت

رسول الله صلی الله علیه وسلم فرمايي : چا چې د هر مانځه نه وروسته دري دېرش ځله سُبْحَانَ اللَّهِ وويل ، دري دېرش ځله يې الْحَمْدُ لِلَّهِ وويل، دري دېرش ځله يې اللَّهُ أَكْبَرُ وويل نو دا ٩٩ شول او د سلو د پوره کولو لپاره يې لَا إِلَهَ إِ لَّا اللهُ وَحْدَه لَا شَرِيْكَ لَه لَهُ الْمُلْكُ وَلَهُ الْحَمْدُ وَهُوَ عَلى كُلِ شَيْءٍ قَدِيْر وويل نو د هغه ګناهونه به وبښل شي اګر که د سمندر د ځګ په اندازه وي . صحیح مسلم

فايده من کلمات

رسول الله صلی الله علیه وسلم فرمايي : داسې کلمې دي چې د هغې ويونکى يا کوونکى نه نقصاني کيږي دري دېرش ځله سُبْحَانَ اللَّهِ ، دري دېرش ځله الْحَمْدُ لِلَّهِ ، څلور دېرش ځله اللَّهُ أَكْبَرُ د هر مانځه نه وروسته . صحیح مسلم

د هر مانځه نه وروسته :

سُبْحَانَ اللَّهِ (٣٣ ځــــله)
الْحَمْدُ لِلَّهِ (٣٣ ځـــــله)
اللَّهُ أَكْبَرُ (٣٤ ځـــــله)

د ګناهونو مغفرت

رسول الله صلی الله علیه وسلم فرمايي : هغه څوک چې خپلې بسترې ته لاړ شي ووايي لَا إِلَهَ إِلَّا اللهُ وَحْدَه لَا شَرِيْكَ لَه لَهُ الْمُلْكُ وَلَهُ الْحَمْدُ وَهُوَ عَلى كُلِ شَيْءٍ قَدِيْر لَا حَوْلَ وَلَا قُوَةَ إِلَا بِاللهِ الْعَلى العَظِيْم ، سُبْحَانَ اللهِ وَبِحَمْدِه ، وَ الْحَمْدُ لِلَّهِ ، وَ لَا إِلَهَ إِ لَّا اللهُ ، وَ اللَّهُ أَكْبَرُ.
د هغه ګناهونه به وبښل شي اګر د سمندر د ځګ په اندازه هم وي . صححه الالباني

د يوې مياشتې د ګناهونو مغفرت

رسول الله صلی الله علیه وسلم فرمايي : څوک چې ووايي :

لَا إِلَهَ إِ لَّا اللهُ و اللَّهُ أَكْبَرُ لَا إِلَهَ إِ لَّا اللهُ وَحْدَه لَا إِلَهَ إِ لَّا اللهُ وَ لَا شَرِيْكَ لَه لَا إِلَهَ إِ لَّا اللهُ لَهُ الْمُلْكُ وَلَهُ الْحَمْدُ لَا إِلَهَ إِ لَّا اللهُ وَ لَا حَوْلَ وَلَا قُوَةَ إِلَا بِاللهِ (راوي وايي) رسول الله صلی الله علیه وسلم په ګوتو باندې پنځه و شمارلې بيا يې وفرمايل څوک چې په ورځ کې يا په شپه کې او يا په مياشت کې ووايي بيا پدې ورځ ، پدې شپه او يا پدې مياشت کې مړ شي د هغه ګناهونه به وبښل شي . صحیح الترغیب و الترهیب

د ګناهونو مغفرت

رسول الله صلی الله علیه وسلم فرمايي :

په زمکه باندې څوک نشته چې (د زړه د اخلاص نه) ووايي :
لَا إِلَهَ إِ لَّا اللهُ اللَّهُ أَكْبَرُ لَا حَوْلَ وَلَا قُوَةَ إِلَا بِاللهِ

مګر د هغه ګناهونه به و بښل شي اګر که د سمندر د ځګ په اندازه وي . حسنه الالباني

نکته : علماء کرام فرمايي چې په ا حاديثو کې کله هم داسې الفاظ راځي چې پدې کلمه يا دې عمل سره د بنده ګناهونه ختميږي نو مطلب يې واړه ګناهونه وي او لوى ګناهونه تر توبې او استغفار وروسته الله جل جلاله بنده ته بښي چې ورته خوښه يې شي.

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
Would love your thoughts, please comment.x
()
x