د شیطان پېژند ګلوي (شپاړسمه برخه)

لیکوال : دکتور کفایت الله وردګ

یادګېرنه : په تېرو برخو کې د انسان او شیطان د دښمني په اړه خبرې په تېره برخه کې مو پدې خبرې کولې چې شیطان په کومو حالتونو کې ډېر راځي په تېره برخه کې تېر شول چې کله ماشوم اول پیدا شي نو شیطان ورته راځي ، کله چې ا نسان مونځ کوي شیطان ورته راځي چې دا مونځ پرې خراب کړي او په فکرونو او چورتونو یې سر کړي ، شیطان انسان ته ارګمی ورولي د تېرې برخې په تعیقیب ..

د خوب په وخت کې

کله چې انسان ويده کيږي نو د خوب په وخت کې چې اذکار او تلاوت کوي او پدې حالت کې ويده شي نو ټول خوب ورته په عبادت کې حسابيږي خو پدې وخت کې شيطان انسان ته راځي او نه پريږدي چې انسان ذکر او تلاوت وکوي بلکه ددې په ځای چې انسان تلاوت وکوي شيطان ورته نور فکرونه او تصورات ور واچوي په هغې کې يې غرق کړي او په همدې حالت کې خوب پرې راشي او ويده شي .
حضرت عبد الله بن عمر رضی الله عنه فرمايي رسول الله صلی الله علیه و سلم فرمايل :
خلتان لا يحصيهما رجل مسلم إلا دخل الجنة، ألا وهما يسير ومن يعمل بهما قليل يسبح الله في دبر كل صلاة عشرا ويحمده عشرا ويكبره عشرا قال فأنا رأيت رسول الله صلى الله عليه وسلم يعقدها بيده قال: فتلك خمسون ومائة باللسان وألف وخمس مائة في الميزان، وإذا أخذت مضجعك تسبحه وتكبره وتحمده مائة فتلك مائة باللسان وألف في الميزان.فأيكم يعمل في اليوم والليلة ألفين وخمس مائة سيئة؟ قالوا: فكيف لا يحصيها؟ قال يأتي أحدكم الشيطان وهو في صلاته فيقول: اذكر كذا اذكر كذا حتى ينفتل، فلعله لا يفعل ، ويأتيه وهو في مضجعه فلا يزال ينومه حتى ينام. سنن الترمذي
ترجمه : دوه عادتونه دي کوم مسلمان د هغې ساتنه نه کوي مګر هغه به جنت ته ننوزي خبردار هغه اسانه دي او هغه چې عمل ورباندې کوي لږ دي د هر مانځه نه وروسته به لس ځله سبحان الله وايي ، لس ځله به الحمد لله وايي او لس ځله به الله اکبر وايي حضرت عبد الله بن عمر رضی الله عنه فرمايي ما رسول الله صلی الله علیه و سلم ليدلو چې په ګوتو باندې يې شمار کول ويې فرمايل دا يو نيم سل دي په ژبه باندې او يو نيم زر دي په تله کې (د نيکي بدله يو په لسه ورکوله کيږي) او کله چې بسترې ته لاړې نو سبحان الله ، الحمد لله ، الله اکبر به سل ځله ووايې (سبحان الله او الحمد لله ۳۳ ځله او الله اکبر ۳۴ ځله) دا سل دي په ژبه او زر دي په تله کې نو په تاسې کې به څوک داسې وي چې په شپه او ورځ کې به دوه نیم زره ګناهونه کوي؟ صحابه وو (چې دومره لوی فضیلت واورېدو نويې) پوښتنه وکوله نو بیا ولې خلک ددې ساتنه نه کوي؟ رسول الله صلی الله علیه و سلم وفرمایل ستاسې یو چې په مانځه کې وي شیطان ورته راشي ورته وایي دا یاد که دا یاد که تردې چې مونځ ورباندې ګډ وډ کړي (نو چې کله له مانځه نه فارغ شي نو مختلف کارونه يې ورته په ذهن کې اچولي وي ) نو ډېر کم داسې وي چې د مانځه نه وروسته بیا اذکار وکوي او څوک چې خوب ته تیار وي شیطان ورته راشی ویده یې کړي تردې چې ويده شي او دا ذکر ورڅخه پاتې شي.

کله چې انسان ویده وي شیطان ورته راځي او ورسره وي ترڅو هغه د شپې مانځه ته او يا دورځې عبادت ته پورته نه شي له حضرت ابي هریره رضی الله عنه څخه روایت دی هغه فرمایی رسول الله صلی الله علیه و سلم فرمايل : يعقد الشيطان على قافية رأس أحدكم إذا هو نام ثلاث عقد، يضرب كل عقدة عليك ليل طويل فارقد، فإن استيقظ فذكر الله انحلت عقدة، فإن توضأ انحلت عقدة فإن صلى انحلت عقدة فأصبح نشيطا طيب النفس وإلا أصبح خبيث النفس كسلان. متفق علیه
ترجمه : (کله چې تاسې ویده وئ) شیطان تړي له سر ستاسې د یوه سره کله چې هغه ویده وي دری غوټې د هرې غوټې سره وايي او پدې ډول يې تړي چې وايي شپه اوږده ده ویده شه نو که دا کس را ويښ شي او د الله جل جلاله ذکر وکوي نو یوه غوټه ورڅخه خلاصه شي ، که یې اودس وکولو نو بله غوټه ورڅخه خلاصه شي او که مونځ يې وکولو نو بله غوټه ورڅخه خلاصه شي نو په صبا کې دا بیا خوشحال وي او طبیعت یې جوړ وي او که نه ذکر ، نه اودس او نه مونځ وکوي نو پداسې حالت کې را پورته شي چې ‌ طبیعت يې خراب او سست وي .

له حضرت ابي قتادة رضی الله عنه څخه روایت دی چې رسول الله صلی الله علیه و سلم فرمایل : الرؤيا الصالحة من الله والحلم من الشيطان، فإذا حلم أحدكم حلما يخافه فليبصق عن يساره وليتعوذ بالله من شرها فإنها لا تضره. صحیح البخاري
ترجمه : نېک خوب له الله جل جلاله څخه دی او ګډ وډ خوب له شیطان څخه دی کله چې په تاسې کې چا شیطاني خوب وليدو چې دی ورڅخه ډارېدو نو چپ طرف ته د ناړې تف کړي او ددې خوب له شر نه د په الله جل جلاله باندې پناه وغواړي بېشکه دا به ورته ضرر نه رسوي.

له حضرت جابر رضی الله عنه څخه روایت دی هغه فرمایی رسول الله صلی الله علیه و سلم ته یو کوچی راغلو ورته ویل يې : إني حلمت أن رأسي قطع فأنا أتبعه، فزجره النبي صلى الله عليه وسلم وقال: لا تخبر بتلعب الشيطان بك في المنام . صحیح مسلم
ترجمه : ما خوب لیدو چې سر مې رانه پرې وو زه ورپسې روان وم رسول الله صلی الله علیه و سلم هغه تهدید کړو ورته یې وويل : کله چې د شپې شيطان په تا باندې لوبې کوي د هغه قصه بیا مه کوه .

له حضرت عبد الله بن عمر رضی الله عنه څخه روايت دی هغه فرمایي د رسول الله صلی الله علیه و سلم په وړاندې څوک یاد شول یو کس وویل : هغه تر سهاره پورې ویده وو مانځه (تهجد) ته پورته نه شو رسول الله صلی الله علیه و سلم وفرمايل : بال الشيطان في أذنه (شیطان یې په غوږ کې متیازې ور کړې دي) . صحیح البخاري

د خوراک او څښاک په وخت کې

کله چې انسان خوراک او څښاک کوي هم شیطان ورته راځي هغه هم له ده سره خوراک کول غواړي او هغه کسان چې په خپل خوراک او څښاک باندې له شروع سره بسم الله ووایي هغوی خپل خوراک له شیطان څخه وساتلو له حضرت جابر بن عبد الله رضی الله عنه څخه روایت دی هغه فرمایی ما له رسول الله صلی الله علیه و سلم څخه واورېدل چې فرمایل یې: إذا دخل الرجل بيته فذكر الله عند دخوله وعند طعامه قال الشيطان: لا مبيت لكم ولا عشاء، وإذا دخل فلم يذكر الله عند دخوله قال الشيطان: أدركتم المبيت، فإذا لم يذكر الله عند طعامه قال: أدركتم المبيت والعشاء. صحیح مسلم
ترجمه : کله چې یو سړی کور ته ننوزي نو په ننوتلو کې او د خوراک کولو په وخت کې یې الله جل جلاله یاد کړو شیطان وايي دلته نه تاسې ته د شپې ځای شته او نه درته د ماسخوتن ډوډۍ شته او کله چې په ننوتلو کې بسم الله ونه وایي شیطان (خپلو نورو ملګرو ته ) وايي د شپې ځای مو پیدا کړو او کله چې د خوراک په وخت کې بسم الله ونه وايي نو شیطان (خپلو نورو ملګرو ته) وايي د شپې ځای مو هم پیدا کړو او خوراک مو هم پیدا کړو .

له حضرت جابر رضی الله عنه څخه روایت دی هغه فرمايي ما له رسول الله صلی الله علیه و سلم څخه واورېدل چې فرمايل یې :إن الشيطان يحضر أحدكم عند كل شيء من شأنه حتى يحضره عند طعامه، فإذا سقطت من أحدكم اللقمة فليمط ما كان بها من أذى ثم ليأكلها ولا يدعها للشيطان، فإذا فرغ فليلعق أصابعه، فإنه لا يدري في أي طعامه تكون البركة.
ترجمه : بېشکه شيطان لتاسې د یو سره په هرشي کې حاضریږي تردې چې د هغه په خوراک کې کله چې له یو د تاسې نه نوړۍ و غورځېده نو که کوم شی ورپورې نښتي وو هغه د ورڅخه لرې کړي بیا د وخوري او شیطان ته د نه پریږدي او کله چې له خوراک نه فارغ شو نو خپلې ګوتې د و څټي ځکه دی نه پوهیږي چې په کوم خوراک کې برکت وو .
بازار ته د تللو په وخت کې

کله چې انسان بازار ته ځي نو هم شيطان یې ملګري کوي او بازارونه هسې هم د شیطان د خوښې ځایونه دي لږ وروسته به راشي له حضرت قیس بن ابي غرزة رضی الله عنه څخه روایت دی هغه فرمايي مونږ ته رسول الله صلی الله علیه و سلم را ووتلو مونږ ته یې وویل : يا معشر التجار، إن الشيطان والإثم يحضران البيع فشوبوا بيعكم بالصدقة. سنن الترمذی
ترجمه : اې تجارانو بېشکه شيطان او ګناه د خرڅلاو ځای ته حاضریږي نو خپلې خرڅونې سره صدقه کوئ .
کله کله چې دکاندار او خریدار خبرې سره کوي په لږ خبره یو بل ته غصه شي او یوبل ته داسې خبرې سره وکوي چې د خولې خوند یې سره خراب شي نو پدې وخت کې شیطان حاضریږي هغه خفه کیږي چې دوه مسلمانان د اخوت او مینې په فضاء کې معاملې وکوي نو هغه کوښښ کوي چې دوی سره خراب کړي (الله د له شیطان نه زمونږ حفاظت وکوي) … نور بیا ان شاء الله

د ځانکدن په وخت کې
کله چې په ژوند کې د انسان آخري لحظات وي نو هم شیطان یې نه معاف کوي په هغه وخت کې هم د انسان د دوکه کولو کوښښ کوي او د ځانکدن په وخت کې ورته حاضريږي ددې امله خو رسول الله صلی الله علیه و سلم مونږ ته را ښودلي دي چې له الله جل جلاله نه د هغه وخت لپاره له شیطان نه پناه وغواړو له حضرت ابی الیسر رضی الله عنه نه روایت دی رسول الله صلی الله علیه و سلم به (مونږ ته د تعلیم په موخه) فرمایل : اللهم إني أعوذ بك من التردي والهدم والغرق والحريق، وأعوذ بك أن يتخبطني الشيطان عند الموت، وأعوذ بك أن أموت في سبيلك مدبرا وأعوذ بك أن أموت لديغا. سنن ابی داود
ترجمه : اې الله جل جلاله زه په تا باندې پناه غواړم له دې نه چې زه له کوم ځای نه را وغورځېږم ، لدې نه چې کوم ځای را باندې را ړنګ شي ، لدې نه چې غرق شم ، لدې نه چې وسوزېږم ، او زه په تا باندې لدې نه پناه غواړم چې شیطان مې د مرګ په وخت کې دوکه کړي او زه له تا نه په دې باندې هم پناه غواړم چې ستا په لار کې په داسې حال کې ووژل شم چې جنګ ته مې شا کړې وي او زه په تا باندې لدې نه هم پناه غواړم چې د کوم شي له چيچلو نه مړ شم .



تبصره وکړه

ستاسو ایمیل ادرس به هیڅ کله نشر نه شي.