نظــر

بندیان څوک شکنجه کوي؟ د سترګو لیدلی حال۴۲

us prisoner torture1دوی زما پښې پورته کړې، په دې وخت کې زما سر ښکته شو، او پښې مې پورته شوې! نور یې له پاسه را ایله کړم، له دې سره زه ځمکې ته را ګوزار شوم، او هغه دوه کسان چې ما یې ګریوانونه نیولي وو، هغوی را څخه خلاص شول! زه په ځمکه په ډېر درب ولګېدم، نور بیا په ځان پوه نشوم چې کیسه څه ډول شوه!

کله چې را په هوش کې شوم، لاسونه مې یې را تړلي وو، ما بیا شروع پرې وکړه، په تړلو لاسونو مې هڅه کوله چې ویې وهم، په دې کې د دوی کوم مشر راغی، هغه نصیحت را ته شروع کړ، چې سړیه تا څه شروع کړي دي؟ داسې مه کوه! دنورو بندیانو په څېر آرام کښېنه! ته څه غواړې؟
ما ویل تاسو ولې ما ته اوبه نه راکوئ! یو ځل یې منډه کړه، ږغ یې وکړ، که ګورم د پیپسي بوتلې یې راوړې، وايې دا دي واخله، اوبه څه چې پیپسې وڅښه! ما ویل زه اوبه غواړم، ښې زیاتې اوبه یې راته راوړې! ما ویل تاسو کفار یاست! ما ولې لمانځه او اوداسه ته نه پرېږدئ! وايې ولې دې نه پرېږدو، سمدستي یې حمام ته بوتلم، وايي اودس وکړه! ورشه لمونځ دې وکړه! مونږ مسلمانان یو، کفار نه یو! راشه په هره خونه کې مونږ قرآن کریمونه بندیانو ته ور کړي، نور یې په خونو وګرځولم، په هره خونه کې یې قرآن کریم را وښود ‎!

ما ویل نه، تاسو کفار یاست، له بندیانو سره لواطت کوئ! دوی ویل، مونږ دا کار نه کوو، ما ویل هغه ورځ ما په خپلو سترګو ولیدل چې تاسو د هغه سپین ږيري له زوی سره څه کول!؟ په دې کې هغه یو څارنوال هغه بل ته ویل چې ما نه درته ویل چې دا کار مه کوه! تا نه منله! هر څو مې چې درته ویل چې د دوی په وړاندې یې مه کوه! دا دي اوس دې داسې کیسه جوړه کړه!

ما ویل تاسو زما له زوی سره هم داسې کوئ! زما زوی هم کشر و، ما چې هغه د سپین ږیري زوی ولید، هره لحظه به مې خپل زوی سترګو ته ودرید، چې له هغه سره به هم داسې جنایت کوي!  ما ویل زما زوی چېرته دی؟ تاسو له هغه سره لواطت کوئ! دوی ویل، ستا زوی هلته په خونه کې دی، نور بندیان هم ور سره شته، دلته هېڅوک داسې کار نه کوي! ما ویل ما په خپلو سترګو ولیدل! آخر یې په ټولو خونو وګرځولم، زما زوی یې هم را وښود! وايي هغه دی ستا زوی په دې خونه کې دی!

 خو زما زړه نه منله چې دوی دې زما له زوی سره هم داسې جنایت نه وي کړی، لکه د هغه سپین ږیري له زوی سره یې چې وکړل! او زه ځکه په دې بېرېدم چې کله دوی په لومړي سر کې مونږ ونیولو، هلته یې زما زوی ته په زور شراب ور کړي وو، په سترګو کې یې شراب ور اچولي وو!
لنډه دا چې ما دوی یوه لحظه نه پرېښودل، څنګه به مې چې ولیدل پرې ور هه به مې کړل، دوی به لکۍ په سر واړولې!! آخر یې زما لاسونه او پښې دواړه را وتړل! آخر مې چې ډېر تنګ کړل، وايي راځه چې سوله سره وکړو! ته غلی شه، جنجال مه کوه! مونږ به دې نه وهو! په همدې مې موافقه ور سره وکړه!

 د نوموړي حاجي صیب دا خبره ځکه سمه وه، چې یو بل ملګری چې له ده سره په ریاست نود کې و، هغه را ته ویل چې دا حاجي صیب په ریاست نود کې لیونی شوی و، نور بندیان یې یوازې په لاسونو تړلي وو، خو ددې حاجي صیب یې  لاسونه او پښې دواړه ولچک کړي وو!
حاجي صیب چې دا کیسې راته وکړې! زما غوني زږه شول! ما ویل ووو حاجي صیب دا څه وايي؟ تا په خپلو سترګو ولیدل چې دې وحشیانو داسې جنایتونه تر سره کول! وايي زه خو څه درواغ نه درته وایم! ما په خپلو سترګو ولیدل! ما ویل فکر به دې نه وي شوی! وايي ولې مې فکر نه و؟ ما ویل دې وحشیانو چې له هغه ځوان سره بدکاري کوله، پلار یې څه نه ورته ویل؟ وايي ولې نه! پلار غریب یې هم تړلی و، هغه زارۍ ورته کولې چې ګورئ! داسې مه کوئ! مګر وحشیانو چېرته د هغه خاطر کولو؟ چېرته یې د هغه خبره منله! حیا او شرم چېرته وو؟!

 له دې ټولو سره بیا هم زما زړه نه منله، ماویل ګوره حاجي صیب! تا به هسې خوب لیدلی وي! یا به دې فکر خراب و، تصور به دې کړی وي! ده راته وخندل! وايي زه درته وایم چې په خپلو سترګو مې ولیدل او ته وايې چې هغسې به وي او دغسې به وي! ما دا حال دسر په سترګو ولیدو، نور یې چې ته هر څه بولو، خوب یې بولې، تصور او خیال یې بولې! او که یې حقیقت بولې!

 د حاجي صیب خبره نوره بالکل روغه او سمه وه، ځکه چې هلته دا مشهوره وه چې دوی له کم عمره مجاهدینو سره په ځانګړي ډول هغوی چې د فدايي بریدونو په تور به یې نیولي وو، دا ډول جنایت تر سره کولو، تر څو دهغوی غرور مات کړي، له ژوند نه یې بېزاره کړي! مګر زه په دې حیران شوم چې آخر د هغه سپین ږیري پلار په وړاندې یې څه ډول دا جنایت تر سره کولو! که څه هم چې د هغوی وحشتونو ته سړی وګوري، د دې ډول جنایتونو تر سره کول هغوی ته کومه لویه خبره نه ده!

  د حاجي صیب د خبرې په تایید څو نورو ملګرو راته وویل چې له مونږ سره په ریاست نود کې په خونه کې څو د کم عمر تنکي مجاهد ځوانان وو، هغوی په خپله خوله مونږ ته ویل چې مونږ یو ځل له دې ځای نه خلاص شو بیا به مونږ له دوی سره ګورو، ځکه چې دوی له مونږ سره داسې چلن وکړ لکه څوک یې چې له نجونو سره کوي! کله به یې چکونه راباندې لګول! که یې به ښکلولو! کله به یې یو څه او کله بل څه راباندې کول، او دا په داسې حال کې چې زمونږ لاسونه به ولچک وو، هېڅ مو نشو ور سره کولی!

 که څه هم چې د کابل په امنیت کې په عام ډول دا رنګه جنایتونه تر سره کېږي،خو زیاتره کمونیستانو دا ډول فحاشۍ او اخلاقي فسادونه کول!
 یو کشر څارنوال و، ما ته په غالب ګومان کمونیست ښکارېدو، ډېر سخت وهل یې کول، او ډېرو ملګرو سختې بدې ورځې ترې کولې! ټولو په نښه کړی و، هغه داسې چې د نوموړي وحشي ژبه برګه وه! توره او سپینه وه! سړي به چې ولیده په طبیعي ډول به یې یو ډول کرکه او نفرت ترې کېدل! زه چې په ریاست نود کې وم، ډېرو ملګرو به له دغه برګ ژبي ځناور نه سخت سر ټکولو، او ټولو به ویل چې که دا کس یو ځل په لاس راغی بیا به ور سره ګورو! ما ویل څه ډول یې ژبه برګه وه؟ دوی ویل توره او سپینه ده، څه وخت وروسته زه خپله ور سره مخ شوم، یو بل کمونیست څارنوال له ما نه تحقیق کولو، هغه خپل ځان ستړی کړ، وهل او ټکول یې وکړل! نور لاړو او دې برګ ژبي ته یې ویل چې ته دلته ده ته ګوره زه راځم! خو وهه یې مه! هغه ویل سمه ده!

زه هملته د تحقیق په وړه بنده خونه کې ولاړ وم، دی په وره کې را ته ولاړ و، هغه لوی کمونیست چې لاړو، دی را لنډ شو، ما  ته یې ویل ته ولې حال نه وايې؟ ما ویل له ما سره څه نشته، وایې را ديخوا شه، زه په داسې حال کې چې دواړه لاسونه مې ولچک وو، ور لنډ شوم، ده خبرې راته کولې، زه ډاډه وم چې وهې خو مې ځکه نه چې هغه بل لوی کمونیست یې ورته وویل چې وهه یې مه! زه یې په خبرو مصروف کړم، داسې چې ما بالکل دا ګومان نه کولو چې دی به مې اوس وهي ! په دې کې یې یو په یو لاس شاته کړ، او  را تاو شو، په دې چپ مخ یې یو ناڅاپه داسې ظالمه مړه او درنده څاپېړه ووهلم چې دی خپله هم ور سره را تاو شو، او زه یې هم را تاو کړم! له دې څاپېړې سره زما په سترګو توره تیاره شوه، په دواړو غوږونو کې مې داسې شرنګهار شو، چې خبره مې نه اورېده، دی راته لګیا وو خبرې یې راته کولې زه نه پرې پوهېدم، چې څه وايي! بالکل ګنګس شوم، او دی را باندې پوه شو چې په سړي مې سخت ګوزار وکړ!  ما یو څه نور هم ځان په ګنګستوب ورته ووهلو! دی تقریبا شل دقیقې راته لګیا وو، په ځينو خبرو خو یې په رښتیا نه پوهېدم او په ځینو چې پوهېدم په هغو ما ځان نه پوهولو!

بیا به یې میز را ته وډبولو! را باندې را برګ به شو، د سر تر ویښتانو به یې ونیوم، کش به یې کړم، ما ځان نه پرې پوهولو، ښه ډېر وخت وروسته مې یې د یوې یوې خبرې ځواب ور کولو، او هغه هم نیم او نیمګور، ما ویل خبرې دې نه اورم! څه وايې! یوه خبره به مې دوه درې، آن څلور ځله پرې تکراروله!

 کله چې پوه شو، چې زه اوس یو څه ښه شوم، نور یې د خلاصون لارې را ته ښودلې، چې څارنوال ته داسې ووایه، داسې ورته ووایه، دا خو ستا حق دی، په دې ته مجرم نه ګڼل کېږې! په یو ډول یې ځان را نېږدې کولو، زه بیا وروسته پوه شوم چې ده دا کار ځکه کولو تر څو که ما ته له دې ګوزار نه کومه ستونزه پیدا شي چې زه بیا له ده نه شکایت ونه کړم… نور بیا

عبد الحنان مجاهد

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
Would love your thoughts, please comment.x
()
x