د شیطان پېژند ګلوي (څلورویشتمه برخه)

لیکوال : دکتور کفایت الله وردګ

یادګېرنه  : په تېرو برخو کې د انسان او شیطان د دښمني په اړه خبرې  په تېره برخه کې مو دا خبره شروع کړې وه چې شیطان په انسان یو کار څنګه کوي؟ ددې لپاره هغه څه لارې لري چې یوه یې وسوسه  ده په آتلسمه او نولسمه برخو کې مو مختلفو خلکو ته د شیطان د مختلف ډوله وسوسو په اړه خبرې وکولې  کله چې شیطان انسان ته وسوسه ور اچوي ددې لپاره شیطان یوه لاره پیدا کوي چې انسان نفس ته له هغې لارې ننوزي  اوس دا شیطان انساني نفس ته له کومې لارې ننوزي دا د ټولو انسانانو لپاره یو شان نه وي په تېرو برخو کې مو د شیطان په څلور لارو خبرې وکولې د هغې  په تعقیب   …

انساني نفس ته د شیطان پنځمه لاره: د خپلو پلرونو متابعت

د اکثرو خلکو ګمراه کولو ته شیطان لدې نه لاره ور پیدا کړي چې هغه کسان په هر څه کې د خپلو پلرونو په لاره باندې روان وي او چې څه خبره شي نو هغوی ددې په ځای چې کوم آیت ، حدیث ، د سلفو عمل په دلیل کې راوړي د خپلو نیکونو عمل دلیل ګرځوي او ضروري نه ده چې پلرونو څه کړي دي هغه د ټول سم وي  کله به چې رسول الله صلی الله علیه و سلم  هم خلکو ته د مبارک دین لور ته دعوت ورکولو نو د هغوی سره هېڅ داسې قوي دلیل نه وو چې دوی د رسول الله صلی الله علیه و سلم  د دعوت د نه منلو لپاره دلیل کړی وای خو بس دومره به یې ویل چې : زمونږ پلرونه او نیکونه په همدې دین وو مونږ د خپلو پلرونو دین نه پرېښودل غواړو نو ددې امله په قرآن کریم کې په مختلفو ځایونو کې د همدې موضوع ذکر راغلی دی د مثال په ډول :

الله جل جلاله  فرمايي : وَإِذْ أَخَذَ رَبُّكَ مِنْ بَنِي آَدَمَ مِنْ ظُهُورِهِمْ ذُرِّيَّتَهُمْ وَأَشْهَدَهُمْ عَلَى أَنْفُسِهِمْ أَلَسْتُ بِرَبِّكُمْ قَالُوا بَلَى شَهِدْنَا أَنْ تَقُولُوا يَوْمَ الْقِيَامَةِ إِنَّا كُنَّا عَنْ هَذَا غَافِلِينَ (172). سورة الاعراف

ترجمه : او  (یاد کړه اې محمده!) هغه وخت چې واخیست رب ستا له بنې آدمو ځنې له شاګانو د دوی څخه اولادې د دوی او شاهدان یې کړل دوی پر ځانونو خپلو لاندې (او وفرمایل الله جل جلاله  دوی ته) آیا نه یم زه رب ستاسې! وویل دوی (او اقرار یې وکړ) هو! (ته رب یې زمونږ  په ربوبیت د الله جل جلاله  ) ګواه کړه مونږ خپل نفسونه ،  (ددې جهته) چې  و (نه) وایئ تاسې په ورځ د قیامت کې چې بېشکه مونږ وو له دغه (توحیده) غافلان  (ناخبران) .

په بل ځای کې الله جل جلاله  فرمايي : إِنَّهُمْ أَلْفَوْا آَبَاءَهُمْ ضَالِّينَ (69) فَهُمْ عَلَى آَثَارِهِمْ يُهْرَعُونَ (70) وَلَقَدْ ضَلَّ قَبْلَهُمْ أَكْثَرُ الْأَوَّلِينَ (71). سورة الصافات

ترجمه : بېشکه دوی موندلي دي پلرونه خپل ګمراهان پس دوی په قدمونو (پلو) د هغوی پسې زغلي منډې وهي (د هغوی تقلید کوي دلیل او برهان ته نه ګوري) او خامخا په تحقیق ګمراه شوي وو پخواله دوی نه اکثر د ړمبنیو.

په بل ځای کې الله جل جلاله  فرمایی : وَإِذَا فَعَلُوا فَاحِشَةً قَالُوا وَجَدْنَا عَلَيْهَا آَبَاءَنَا وَاللَّهُ أَمَرَنَا بِهَا قُلْ إِنَّ اللَّهَ لَا يَأْمُرُ بِالْفَحْشَاءِ أَتَقُولُونَ عَلَى اللَّهِ مَا لَا تَعْلَمُونَ (28). سورة الاعراف

ترجمه : او کله چې وکړي دوی کوم فاحشه (ناکاره کار لکه شرک) نو وائي دوی موندلي دي مونږ پر دغه (ناکاره کار) پلرونه خپل او الله جل جلاله  هم امر کړی دی مونږ ته په (کولو د) دې سره ، ووایه (اې محمده ! دوی ته) چې بېشکه الله جل جلاله  نه کوي امر په فحشاء (ناکاره کارونو) ، آیا وایئ (دروغ تړئ) تاسې پر الله جل جلاله  باندې هغه شی چې نه پوهیږئ (پرې) تاسې.

په بل ځای کې الله جل جلاله  فرمایی :قَالُوا أَجِئْتَنَا لِنَعْبُدَ اللَّهَ وَحْدَهُ وَنَذَرَ مَا كَانَ يَعْبُدُ آَبَاؤُنَا فَأْتِنَا بِمَا تَعِدُنَا إِنْ كُنْتَ مِنَ الصَّادِقِينَ (70). سورة الاعراف

ترجمه : وویل عادیانو (هود علیه السلام  ته) آیا راغلی یې ته مونږ ته د دې د پاره چې عبادت وکړو مونږ د الله جل جلاله  یوازې او پریږدو هغه (بتان) چې وو چې عبادت به کاوه (دهغو) پلرونو زمونږ نو راوړه مونږ ته هغه عذاب چې ته (پرې) ویروې مونږ که یې ته له صادقانو (رښتیا ویونکو په خبرو خپلو کې) .

په بل ځای کې الله جل جلاله  فرمايي : وَإِذَا قِيلَ لَهُمْ مَاذَا أَنْزَلَ رَبُّكُمْ قَالُوا أَسَاطِيرُ الْأَوَّلِينَ (24) لِيَحْمِلُوا أَوْزَارَهُمْ كَامِلَةً يَوْمَ الْقِيَامَةِ وَمِنْ أَوْزَارِ الَّذِينَ يُضِلُّونَهُمْ بِغَيْرِ عِلْمٍ أَلَا سَاءَ مَا يَزِرُونَ(25).  سورة النحل

ترجمه : او کله چې وویل شي دغو (کبر کوونکو ) ته څه شی دي هغه چې نازل کړي دي رب ستاسې (په محمد باندې) نو وائي دوی (دغه) خوشې افسانې د پخوانیو (خلقو) دي .  (نو الله جل جلاله  فرمائي دا وینا کوي دوی) د پاره د دې چې په شا واخلي پیټی (د ګناهونو) خپلو پوره په ورځ د قیامت کې او (هم داسې واخلي) له پیټي (د ګناهونو) د هغو (کسانو) چې ګمراه کړي دي دوی هغوی لره  په نا پوهي ، واورئ خبر دار شئ چې بد دي هغه څیز چې باروي ئې دوی (پر شاوو خپلو) .

پدې ټولو آیتونو کې د پلرونو په غلطه لاره د تللو ذم بیان شوی دی ددې معنی دا نه ده چې یوازې د کفارو پلرونو په لاره تلل بده خبره ده بلکه که په تېر وخت کې زمونږ مشرانو هر عمل کړی وي او هغه مونږ ته اوس د رواج په توګه پاتې وي نو مونږ باید په پټو سترګو هغه رواج ونه  کوو اول یې باید د قرآن کریم ، د رسول الله صلی الله علیه و سلم  د مبارکو احادیثو او د پخوانیو علماوو له عملونو سره مقایسه کړو چې هغوی کړی دی کنه؟ که هلته ورباندې څه دلیل موجود وي نو باید په سر سترګو يې قبول کړو او جاري یې وساتو او که چېرته یې هلته ساری نه لیدل کیږي نو باید ځان ورڅخه خلاص کړو  ځکه که مونږ د خپلو پلرونو په هر ډول خبره کې متابعت وکوو نو لدې خوا به شیطان زمونږ زړونو ته لاره پیدا کړي ا و مونږ به په هغه کارونو هم په اسانۍ سره را واړوي چې زمونږ مشرانو کړي دي سره ددې چې هغه به صحیح نه وو ، بیا به مونږ له هغه نه دفاع کوو ، هغه ته به له ځانه دلائل هم لټوو  حال دا چې ښه خبره داده چې انسان کوم عمل کوي نو دلیل ورسره د قرآن کریم آیت ، د رسول الله صلی الله علیه و سلم  حدیث او يا د سلفو عمل وی . .. ..

نور بیا ان شاء الله



تبصره وکړه

ستاسو ایمیل ادرس به هیڅ کله نشر نه شي.