د ملي اردو ځواکونه د زړه سوي وړ دي!

نن ټکی اسیا – سرلیکنه:

تیره ورځ د سره صلیب کمیټې د اروزګان ولایت په چوره ولسوالۍ کې د هغو وژل شویو دولتي سرتیرو جسدونه خپلو خپلوانو ته وسپارل کوم چې تر وژل کیدو وروسته څو ورځې د جګړې په ډګر کې پاتې وو.

د دغو وژل شويو سرتیرو جسدونه چې ټول د ملي اردو په رسمي لباس ملبس و په خورا بوږنوونکي وضعیت کې عکاسي او انځورونه یې په ټولنیزو رسنیو کې نشر کړل شوي هم وو.

د اسلام مقدس دین انساني کرامت ته په درناوي سره د مړیو د جسدونو له هرډول توهین او بي حرمتي څخه په کلکه منع فرمایلې ده.

رسول الله صلی الله علیه وسلم به له مشرکینو سره د جګړې په مهال صحابه کرام رضوان الله تعالی علیهم اجمعین د مړیو له مُثله او نُهبه (پوزي او غوږونو پري کولو) او د هغوي له بیحرمتي کولو څخه منع کول.

له بده مرغه زمونږ په هیواد کې د اوږدې جګړې له امله پر نورو ناخوالو سر بیره دغه اصل هم له پامه لویدلی او د جګړې په مهال د ښکیلو اړخونو لخوا د وژل شویو د جسدونو انساني کرامت ته توجه نه کیږي، ډیر وخت داسې پیښ شوي چې هغوی په موټرونو پوري تړل شوي ، کله هم د خلګو د ویرولو په غرض د موټرو او جنګي وسائطو په بانټ (مخ) غورځول شوي ، سوځول شوي او کله هم تر ورځو ورځو پوري همداسې سره لمر ته پاتي شوي دي.

دلته زمونږ اصلي خبره د چوري په ولسوالۍ کې د وژل شویو ملي اردو سرتیرو په وضعیت باندې ده.

د چورې په ولسوالۍ کې وژل شویو د ملي اردو ځواکونو له خپل لوري تر هغو پوري له دولتي حاکمیت څخه دفاع وکړه ترڅو یې خپل ژوند له لاسه ورکړ، خو دولت یې نه یواځې دا چې د هغوي په ژوند ژغورلو کې کومه توجه و نه کړه ؛ بلکې د هغه ترڅنګ یې تر وژل کیدو وروسته هم هغوي همداسې د جګړې په ډګر کې بي برخلیکه پریښودل چې که د سره صلیب مرسته نه وای ښايي اوس  هم لا د هغوي بي روحه جسدونه همداسې سره لمرته پراته وای.

دا چې یو سر تیری د خپل دولت په دفاع کې د سر ورکولو تر بریده جنګیږي په کار ده چې دولت یې هم په بالمثله معاملې سره د هغه د قربانیو درناوی وکړي.

خو زمونږ د ملي اردو سرتیري دومره بي ارزښته دي چې نه یې څوک د ژوند پروا کوي او نه هم د مرګ .

په ژوند کې یا د مخالفینو تر محاصرې لاندې په تدریجي مرګ مري او یا هم د امریکایانو په اشتباهي !!! بمباریو کې وژل کیږي چې جسدونه یې په شپو، شپو د جګړې په ډګر کې پاتې وي او څوک یې د تکفین او تدفین پوښتنه هم نه کوي .



یوه تبصره

  1. الحاج استاذ بیانزی

    همدا د کاپیټالیزم لوی فارمول او بلا ده چه :
    تر ټولو لمړی حتی هغو هیوادو کی چه دوی ورته خبل واایی [ نهه نوی سلنه خلک یی د فقر او سواد له کچی ښکته ساتلی او یو سلنه یی بیلونران کړی ] همدا فارمول به مستعمره هیوادو کی هم عملی کړی او عملی کوی ، یعنی هغه نهه نوی سلنه خلک له یوی مخی نابوهه ( څه چه ورباندی کوی هغه پری کوی څه چه ورته وایی هغه به منی ) او د بل اړخه وږی او تړی دی له یوی خوا کارونه یی قصدا کمیابه کړی او له بلی خوا هغوی مسلکی پوهه نه لری چبرا همدغه عسکری او بولیسی کی په لږو معاشو استخدامیږی که غواړی چه ژوندی پاتی شی او یا یی کورنی ژوندی پاتی شی ، تر هغی یی کاروی چه زوندی وی او د دوی خدمت یا دفاع کولای شی له هغه وروسته د تشناب کاغذ دی که نور غریب پیدا نه شی چه خخ یی کړی د زمکی په مخ به یی سپی او لیوان غوښی وخوری او یا به یی د بوی له امله خلک مجبور شی کوم دریاب ته یی خطا کړی

تبصره وکړه

ستاسو ایمیل ادرس به هیڅ کله نشر نه شي.