د بلاک هاک له بغل سره، د معروف سقوط

زخمي افغان

په داسې حال کې د افغانستان لپاره د امریکایي ولسمشر ډونالډ ټرمپ د ستراتیژۍ په اعلان میاشتې اوړي او امریکایي جنرالان په افغانستان کې د خپلو بمبارونو او پوځي عملیاتو د بې سابقې زیاتوالي نه خبر ورکوي، له عمومي وضعیت څخه داسې ښکاري چې لا هم د امریکایانو نوي جنګي عزم د جګړې په میدان کې کوم د پام وړ اغیز نه دی درلودلی او د جګړې په میدان کې د عمل ابتکار لا هم د طالبانو په لاس کې دی.

د هیواد په شمال سرپل ولایت کې د میرزا اولنګ ستراتیژیکه سیمه چې ساتل او دفاع کول یې اوس د کابل حکومت د خپل پوځي حیثیت خبره بولي، رسنۍ وایي چې د حکومت له هر څومره پوځي هڅو سره سره دغه سیمه یو ځل بیا د طالبانو لخوا نیول شوې ده او حکومتي قواوې یې له سیمې تیښتې ته مجبورې کړي دي.

د هیواد په جنوب کې د جګړه ایز وضعیت محور او تر ټولو کلیدي سیمه د کندهار ولایت دی، چې امریکایان په کې د هیواد په سطحه دوهمه تر ټولو ستره پوځي اډه لري او ساتنې ته یې تر بل هره سیمه ډیره توجه کوي. څو ورځې وړاندې چې امریکایانو داخلي حکومت ته د بلاک هاک په نوم پوځي چورلکې سپارلې نو د امنیتي اهمیت له امله یې د سپارلو مراسم هم د کندهار په هوایي ډګر کې جوړ کړي وو. امریکایي جنرال نکولسن او اشرف غني په هغو مراسمو کې طالبانو ته خورا سخت لفظي ګواښونه وکړل او حتی ویي ویل چې د بلاک هاک چورلکو راتګ د طالبانو د ځپل کیدو په معنی دی.

خو لا د بلاک هاک څرخکو په اړه خبرونه د رسنیو له سرخطونو نه دي لویدلي چې طالبانو د بلاک هاک له بغل سره د معروف ولسوالي تر خپل کنټرول لاندې راوسته. خبري سرچینې وایي چې د طالبانو د هجوم له ویرې حکومتي قواوې د کندهار په ختیځه خوا کې د معروف له پراخې او ستراتیژيکي ولسوالۍ څخه تیښتې ته اړ شوي دي.

خبرونه وایي چې دا ځل حکومتي قواوو معروف ولسوالي د تل لپاره پرې ایښي ده. ځکه حکومتي عسکرو د تیښتې په وخت د ولسوالۍ پوځي تاسیسات سوځولي او بیا یي د تیښتې لاره نیولې. طالبان وایي چې د معروف په جګړه کې یې حکومتي عسکرو ته مرګ ژوبله هم اړولې او یو شمیر حکومتي عسکر یي له مهماتو سره ژوندي نیولي دي.

د طالبانو لاس ته د کندهار په ولایت کې د معروف په شان د مهمې او پراخې ولسوالۍ لویدل دا په ډاګه کوي چې طالبانو د ټرمپ له تازه دمو بمبارونو سره ځان عیار کړی او د خپلو پوځي تاکتیکونو په بدلون او انکشاف سره توانیدلي چې پوځي وضعیت په خپل ګټه تغیر کړي. طالبانو نه یوازې دا چې خپله د تلفاتو کچه یې حد اقل ته راټیټه کړې، خپلې تر لاس لاندې سیمې یې ساتلې او حتی د اضافه نورو سیمو د نیولو لړۍ یې هم جاري ساتلې.

طالبان په داسې حال کې د عمل په ډګر کې برلاسي ښکاري چې حکومتي اړخ د تل په څیر یوازې مطبوعاتي دروغو او د لاسته راوړنو په اړه د بي اساسه اوازو خپرولو ته کار ویلی او ټوله انرژي یې یوازې په دروغجنو دعوو مصرفیږي.



یادونه: په نن ټکی اسیا کې لیکنې یوازې د لیکوال خپل نظر څرګندوي، د ادارې توافق ورسره شرط نه دی. که تاسو غواړئ نن ټکي اسیا کې مو لیکنه خپره شي، اړیکه راسره ونیسئ. مننه

تبصره وکړه

ستاسو ایمیل ادرس به هیڅ کله نشر نه شي.