غزل

شرافت ویاړ

د بنګړو شرنګ د سترګو جنګ له کلي ورک کړ ملنګ
د مینې بنګ پر جانان ننګ له کلي ورک کړ ملنګ

د یو چا ناز د زړه اواز او د سرکو شونډو ساز
پاسته پلنګ د جانان څنګ له کلي ورک کړ ملنګ

هغه سړي هه تورپیکي هغه شپونکي غرني
هغه لونګ او غنمرنګ له کلي ورک کړ ملنګ

زړه کې مدغم د جانان غم سپېرې کوڅې سپېره چم
د زړګي زنګ د وینو رنګ له کلي ورک کړ ملنګ

کاږه باڼه ستا تور لېمه ویاړ! یې دی ویشتی پر زړه
په ونه دنګ هغه خشنګ له کلي ورک کړ ملنګ

avatar
  ګډون وکړئ  
خبرتیا غوښتل د