شعـــــرونه

زموږ غمیزه

لکه ګلاب ښکاري بغداد انځور رنګين ورسره
مصر په وينو کې لمبيږي فلسطين ورسره
په تباهۍ د اسلامي نړۍ چا ونه ژړل
په زمزمو د هلاکو ځي تور او سپين ورسره
په سره اور وسو د (( څلويښت ابدالو)) شام شريف
شيعه سني شته خو هيڅ نشته درد د دين ورسره

سيند ورته خوړ، غرونه يې ښپو لاندې مېده مېده وو
هغه مومن څه شو و ايت مبين ورسره
په لوی اسلام جنګ دی ملا صېب ضوات او زوات پرېده
شيطان راوتی دی ملګري ټول ضالين ورسره
د اسيا د زړه تودوخه شاوخوا ته رسي
دښمن زموږ پر سر لوبيږي روس او چين ورسره
د زمانې کوم يو فرعون ته بيا نيل جوړيږي
څپې څپې ځې زموږ وينې اباسين ورسره
د شفقي کابل تصوير خپله چېنه کې ګوري
تندر يې ونېوه فضا هلال پروين ورسره
د سرې ليلا د ډولۍ بد انجام ته يې ونه کتل
د ماتې تور داغ به ډالۍ وړي په جبين ورسره
د پروني غازي وارث د اکبر توره څه کړه
څنګه به غاړه ګرځوي زنار ورېښمين ورسره
زموږ اتل ساړه غوږونه خرابات کې ناست دی
د مليونونو شهيدانو ستر نفرين ورسره
خدايه! مهدي دا د امت ناجي به کله راځي
محشر محشر، پرښتو ووايي امين ورسره
چوپ دې شپيلۍ د تکبير مه شه د ختيځ فاتحه
شمله دې هسکه په ننګ اوسه هوډ يقين ورسره
خلک به وايي چې اسلام او پښتو څه مانا؟
څوک چې غزا له ځي ناګاره اس که زين ورسره

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
Would love your thoughts, please comment.x
()
x