شعـــــرونه

ستړی ژوندون

مفتون احمدزی

د فرقت ستړي ژوندون کښې هجرانونه څيرومه
د وصال رباط امېد کښې منزلونه څيرومه

مسافر دهغې لار يم چه ځوځان دي پري کرلي
د منزل هدف په تمه قدمونه څيرومه

ستړې ساه په منډه درومي په کوګل کښې ښکته پورته
لا ذبيح زړه سېراب نه دی زمزمونه څيرومه

د الفت په سر درو کښې زه راهي د انتظار يم
د يعقوب سومه همګامه کنعانونه څيرومه

بې اثره توند بهير سو د ناخوالومې درشل کښې
ممثل زه د ايوب سوم او صبرونه څيرومه

لر زاغان بر ټپوسان په ګلبڼ توى سول بى جهته
پښتني ګل غوټۍ وسوې سره ګلونه څيرومه

د يزيد په کاروان راغلې د زياد ناړامه زويه
کربلا سوه بيا رنګينه تنکي زړونه څيرومه

د بغداد په سينه مېشت سول تاتاريان د وخت بيا ځلې
ما مې سرپه توره کښېښود او ډالونه څيرومه

زما به څه وکړې هجرانه که مې لوټ د ديدن شپه کړې
زه پيرو د حنظله يم وصالونه څيرومه

سر کشي له دور د څرخ مې , د زور زر صاحب حيران کړ
ما جامو کښې ګور قبول کړ کفنونه څيرومه

د هدف په طرف درومم بې حسابه بې کتابه
حشر نشر نه ګوښه ځم صراطونه څيرومه

ګونګوسې دې د الفت سوې په عالم خپرې “مفتونه””
سر مې بيه کړ وصال کښې فرقتونه څیرومه

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
ستاسو نظر مونږ ته دقدر وړ دی، راسره شریک یې کړئx
()
x