د لوی څښتن تقدير د لعين ټرمپ په تدبير پوري خاندي

عبدالمالک همت

د إسراء د سورې د لومړيو اتو آيتونو د تفسیري ژباړي په رڼاکي څو لنډي څرګندوني.

راځئ درنو لوستونکو يو ځل د قرآن حکيم إسراء د مبارکي سورې د لومړيو اتو آيتونو په تلاوت او د هغو د تفسيري ژباري په ويلو سره خپل زړونه روښانه او منور کړو او بيا به څه نوري خبري وکړ:

﴿سُبْحَانَ الَّذِي أَسْرَى بِعَبْدِهِ لَيْلًا مِنَ الْمَسْجِدِ الْحَرَامِ إِلَى الْمَسْجِدِ الْأَقْصَى الَّذِي بَارَكْنَا حَوْلَهُ لِنُرِيَهُ مِنْ آيَاتِنَا إِنَّهُ هُوَ السَّمِيعُ الْبَصِيرُ (1) وَآتَيْنَا مُوسَى الْكِتَابَ وَجَعَلْنَاهُ هُدًى لِبَنِي إِسْرَائِيلَ أَلَّا تَتَّخِذُوا مِنْ دُونِي وَكِيلًا (2) ذُرِّيَّةَ مَنْ حَمَلْنَا مَعَ نُوحٍ إِنَّهُ كَانَ عَبْدًا شَكُورًا (3) وَقَضَيْنَا إِلَى بَنِي إِسْرَائِيلَ فِي الْكِتَابِ لَتُفْسِدُنَّ فِي الْأَرْضِ مَرَّتَيْنِ وَلَتَعْلُنَّ عُلُوًّا كَبِيرًا (4) فَإِذَا جَاءَ وَعْدُ أُولَاهُمَا بَعَثْنَا عَلَيْكُمْ عِبَادًا لَنَا أُولِي بَأْسٍ شَدِيدٍ فَجَاسُوا خِلَالَ الدِّيَارِ وَكَانَ وَعْدًا مَفْعُولًا (5) ثُمَّ رَدَدْنَا لَكُمُ الْكَرَّةَ عَلَيْهِمْ وَأَمْدَدْنَاكُمْ بِأَمْوَالٍ وَبَنِينَ وَجَعَلْنَاكُمْ أَكْثَرَ نَفِيرًا (6) إِنْ أَحْسَنْتُمْ أَحْسَنْتُمْ لِأَنْفُسِكُمْ وَإِنْ أَسَأْتُمْ فَلَهَا فَإِذَا جَاءَ وَعْدُ الْآخِرَةِ لِيَسُوءُوا وُجُوهَكُمْ وَلِيَدْخُلُوا الْمَسْجِدَ كَمَا دَخَلُوهُ أَوَّلَ مَرَّةٍ وَلِيُتَبِّرُوا مَا عَلَوْا تَتْبِيرًا (7) عَسَى رَبُّكُمْ أَنْ يَرْحَمَكُمْ وَإِنْ عُدْتُمْ عُدْنَا وَجَعَلْنَا جَهَنَّمَ لِلْكَافِرِينَ حَصِيرًا (8) ﴾.

ژباړه:

۱. پاک دی (او د تسبيح او تعظيم)هغه ذات (وړدی) چي (پر هر هغه څه قادر دی چي له ده پرته هيڅوک نه دی پر قادر، دغه ذات هغه دی چي) خپل بنده (محمد صلی الله عليه وسلم) يې د شپې په يوه برخه کي (د مکي) له مسجد حرام څخه (د بيت المقدس) تر مسجد اقصی پوري(په روح او بدن، په ويښه) بوتی، کوم چي موږ يې شاوخواسيمي(په ميوو او کښتونو او د پيغمبرانو په استوګنځايونو) له برکته ډکي کړي دي، څو موږ هغه ته خپلي ځيني نښانې (کومي چي زموږ پر قدرت باندي دلالت کوي) وښيو، بې شکه چي هغه د هري خبري اورېدونکي (دي، هيڅ اورېدونکې خبره نه ځني پټيږي)، د هر شي ليدونکی دی(هيڅ ليدونکی شي نه ځني نيهاميږي) .

۲. او (لکه چي) موږ (محمد صلی الله عليه وسلم ته تر مسجد اقصی پوري په بېولوعزت ورکړ، دغسي مو) موسی (عليه السلام) ته کتاب (تورات) ورکړی وو (او د هغه تکريم او عزت مو کړی وو) او دغه کتاب مو بني اسرائيلو ته د لارښووني وسيله ګرځولی وو (او هغو ته مو وويل چي: ) له ما پرته بل څوک خپل تکيه ځای او ملاتړی(کار ساز او وکيل) مه ګرځوئ (چي خپلي چاري وروسپارئ، بلکي يوازي پرما توکل وکړئ).

۳. تاسي د هغو خلکو له توکمه ياست چي موږ د نوح (عليه السلام) سره (د توپان پر مهال) په بېړۍکي سپاره کړي وه، (اوله ډوبېدوڅخه په ژغورنه سره موخپل نعمت پر ولوراوه، نو تاسي دغه نعمت درياد کړئ او يوازي هغه ته په عبادت کولو سره د هغه شکر ادا کړئ او په دې کي په نوح پسي اقتدا وکړئ، ځکه) هغه الله ته ډېر شکر ايستونکی وو.

۴. او موږ په کتاب (تورات) کي بني اسرائيلو ته خبر ورکړ او پوه مو کړل چي خامخا به تاسي په ځمکه کي (د ګنهونو په ترسره کولو او سرغړوني سره) دوه ځلي ورانی او فساد وکړئ او (پر خلکو باندي به په ظلم کولو او له حد څخه په تېري کولو سره) لويه سرکښي وښياست.

۵. نو کله چي له دغو دوو ورانيو څخه لومړی ورانی (فساد) پېښ سو، موږ پر تاسي باندي زموږ داسي بنده ګان راپاڅول چي په جګړه کي ډېر سخت زړه او زورور وه (چي تاسي يې وژلاست او شړلاست)، نو هغوی ستاسي په هيواد کي په ننوتلو هر لوري ته تيت او خپاره سول (او هرڅه چي په مخه ورتله له منځه يې وړل) او (په دې اړه) د الله وعده خامخا تر سره کېدونکې وه.

۶. بیا (کله چي تاسي الله ته توبه وکښله) موږ تاسي پر دغو دښمنانو باندي(چي پر تاسي باندي برلاسي سوي وه،) برلاسي کړلاست او ستاسي سره مو ستاسي د شتمنويو (تر لوټېدو وروسته) او (ستاسي د) اولادونو (تر وژلو وروسته، د هغو) په بيا (ځلي) درکولو سره مرسته وکړه او تاسي مو د شمېر له مخي ستاسي تر دښمنانو ډېر کړلاست.

۷. ای بني اسرائيلو که تاسي خپل عملونه سم کړئ (په ښه او مطلوبه توګه غوره کارونه وکړئ)، نو بدله يې تاسي ته درګرځي (د خپلي ګټي لپاره به مو کړي وي او خپله به نېکمرغه سئ، الله ستاسي کړنو ته څه اړتيا نه لري) او که بد کارونه وکړئ، نو ستاسي لپاره بد دي (عاقبت يې تاسي ته درګرځي خپل ځانونه به مو بد مرغه کړي وي، الله ته ستاسي د ښو کارونو ګټه نه رسيږي او نه ستاسي بدکارونه هغه ته څه تاوان رسوي). نو کله چي ستاسي له خوا دوهم ورانی تر سره سو(، موږ پر تاسي باندي ستاسي دښمنان بيا مسلط کړل) چي (سپک، خوار او مغلوب مو کړي او په تاسي باندي د ډول ډول سپکاويو د خوند د څکلو په پايله کي) ستاسي پرمخونو باندي ستاسي بد والی څرګند کړي او چي مسجد (بيت المقدس) ته ننوزي او وران يې کړي، لکه چي لومړی ځل ورننوتل او وران يې کړ او ستاسي د هيواد پر کوموځايونو چي يې لاس بر سي په بشپړه توګه يې وران ويجاړکړي.

۸. ای بني اسرائيلو (اوس که تاسي توبه وکاږئ او خپلي کړني سمي کړئ )کېدای سي چي ستاسي پالونکی (تر دغه سخت غچ اخيستلو وروسته) لورونه (رحم) درباندي وکړي، خو که بيا (درېيم ځل يا تردې زيات) ورانۍ او ظلم ته وروګرځئ، نو موږ به هم ستاسي څخه غچ اخيستلو ته وروګرځو او موږ (په الله سره) کافرانو ته جهنم (داسي) بنديخانه جوړه کړې ده (، چي هيڅکله به وتل ځني نه وي).

(په دغه او مخکني آيت کي مسلمانان وېرول سوي دي چي له ګناوو څخه ډډه وکړي، نه چي د بني اسرائيلو کانه په وسي او د هغو په برخليک اخته سي، ځکه د لوی څښتن قانون او سنت په هرمهال کي يو دي او تغير او تبديل نه مومي). صدق الله العظيم.

ويل سوي دي چي: ” التقدير يضحک علی الدبير “، يعني: د لوی څښتن سبحانه تقدير د بنده ګانو په تدبير پوري خاندي، وايي زه څه کوم دوی څه کوي.

حقيقت دادی چي امريکايي او غربي نړۍ خورو ځواکونو او غاصبو اسرائيلو د مهال د مغرور طاغوت ټرمپ په سردمدارۍ په ښکاره او برالا د خدای سبحانه، د اسلام د سپېڅلي دين او د نړۍ د څه له پاسه يو مليارډ مسلمانانو، د هغو د هيوادونو، د هغو د عالمانو او فرهنګ او نورو شؤوناتو سره دښمن را اخيستې ده او دادی اوس ټرمپ په يوه بل ډېر بې سابقه، مذبوحانه او بې باکانه اقدام سره چي هغه بيت المقدس ته د امريکې د سفارت لېږدول او په دې توګه بيت المقدس د اسرائيلو د پلازمېني په رسميت پېژندل دي د اسلام او مسلمانانو سره خپل عناد، حسد او بغض په ډاګه کړ. د دوی خو دا تدبير دی، اما د قرآن کريم د پورتنيو آيتونو په تمک د لوی څښتن تقدير بل څه دی. څنګه چي غاصب اسرائيل او د امريکې او نوري نړۍ يهود په درېيم ځل يا تردې زيات په ظلم او تعدی لګيادي او اوس يې خبره بېخي حادي مرحلې ته ورسول، فکر کيږي چي لوی څښتن هم خپل تدبير په کار اچولی او له دوی څخه غچ اخلي. لوی څښتن دوی، موږ او نورو ته څرګنده کړې ده چي ظلمونه او ورانۍ او فسادونه د لوی څښتن په حضور کي بې له مجازاتو نه پاته کيږي، نو اسرائيل او امریکا او د دوی نور پلوي کفار او مرتدان دي هم د دوی د تباهۍ او ماتي په اړه د الله تدبير ته چمتو او د انتظار په حال کي اوسي. د الله دا ژمنه هرومرو پلې کېدونکې ده، موږ پر الهي ژمنه او کلام ټينګ باور او عقيده لرو والسلام.

1
تبصره وکړئ

avatar
1 د تبصرو شمېر
0 د ځوابونو شمېر
0 ار ایس ایس کې ګډونوال - څارونکي
 
ډېر غبرګون شوې تبصره
تر ټولو ګرمه موضوع
  ګډون وکړئ  
نویو زړو ډیرو خوښو شویو
خبرتیا غوښتل د
نا پيژاند
میلمه
نا پيژاند

د اسلامی معلوماتو څخه یو جهان مننه