پوتين: د امریکا له موجودیت سره سره د افغانستان وضعیت خراب شوی دی
نن ټکی اسیا (سه شنبه، ۵ مرغومي، ۱۳۹۶ل): روسي ولسمشر ویلادي ميرپوتين وايي، سره له دې چې امریکا او ناټو دواړه په افغانستان کې پوځي حضور لري، خو د دې هېواد وضعیت بیا هم خراب دی.
هغه له انټرفکس خبري اژانس سره خبرو کې ويلي، «د امریکا او ناټو په پوځي حضور کې د افغانستان وضعیت خراب شوی، دا واقعیت دی او لا هم په خرابېدو دی.»
پوتين وايي که څه هم د امریکايي او ناټو پوځيانو په حضور کې د افغانستان وضعیت مخ پر سمېدو نه ښکاري، خو مني چې که دوی هم نه وای ښایي حالت تر دې هم خراب شوی وای.
پوتین وروسته له هغه دا څرګندونې کوي، چې تېره ورځ يې په افغانستان کې ځانګړي استازي ضمیر کابولوف دلته د داعش پر پراخېدو اندېښنه وښوده.
کابولوف وويل د داعشي وسله والو شمېر ۱۰ زرو ته رسېږي او په غربي وسلو سمبال د منځنۍ اسیا او روسيې لپاره ستر ګواښ دی.
روسیه په داسې حال کې دا څرګندونې کوي چې تازه چین، پاکستان او افغانستان په پیکنګ کې د روانو مسائلو په اړه غونډه لري.
روسيې تر دې وړاندې هم امریکا او افغان حکومت د داعشي ډلګۍ پر ډېرولو او ملاتړ تورن کړي و.
د افعانستان د دفاع وزارت بیا تېره ورځ د ضمیر کابولوف څرګندونې ناسمې وبللې، دولت وزیري وویل، داعشیان زرګونه نه؛ بلکې سلګونه تنه دي.
د هغه په وینا داعش له پیله تر اوه – اته زره تنه نه اوښت، دوی يې زرګونه تنه وژلي او نیولي دي او اوس يې شمېر سلګونو ته ټيټ شوی دی.
وزیري ونه ویل چې په کومو سیمو کې يې زرګونه داعشیان له منځه وړي دي.
