د بلخ له مرکزي زندان نه پنځه بندیان تښتېدلي دي

نن ټکی اسیا (چهارشنبه، ۶ مرغومي، ۱۳۹۶ل): د بلخ امنیتي چارواکي وايي، د دې ولایت له مرکزي زندان څخه پنځه تنه بندیان په تېښته بریالي شوي دي.

د بلخ د پولیسو امر عبدالرزاق قادري ویلي، تېره شپه د مزار شریف په زندان کې پنځه بندیان له خپلې پنجرې عمومي زندان ته وتلي او د دېوال په سوري کولو سره یې تېښته کړې ده.

د قادري په خبره، پنځه واړه بندیان د جنايي پېښو په تور نیول شوي وو؛ خو تېره شپه یې تېښته کړې ده.

ده ویلي، د بندیانو د بېرته نیولو لپاره یې چاڼیز عملیات پیل کړي دي.

د بلخ له مرکزي زندان نه پنځه بندیان داسې مهال تېښته کوي، چې له تېرو دوو اوونیو راهیسې په دغه ولایت کې د بلخ د ګوښه شوي والي عطاء محمد نور پر سر د ارګ او جمعیت ګوند ترمنځ ناندرۍ روانې دي.

د بلخ له پاره نوي ټاکل شوي والي انجینر داود تراوسه خپله دنده نه ده پیل کړې او نه هم جمعیت ګوند له نوموړي سره هوکړه کړې ده.

avatar
  ګډون وکړئ  
خبرتیا غوښتل د