دمینې فلسفه/طالب الهام

طالب الهام

زده ېې چې دمینې فلسفه کړله
بیامنصورپه دار دحق ناره کړله

جام کې چې دشونډودې شارب شومه
يوځل به مې شکر ، بیاتوبه کړله

هغه دناقوس غږونه ګونګ شول بیا
پیل مې چې د عشق ترانه کړله

ستا د عشق صیام و مسافر ومه
و جانانه ماته مې روژه کړله

هغه دبېلتون شېبې مې یادکې دي
ما چې د خپل عمر جنازه کړله

ډېر به ېې رنځور کړمه نازونوېې
کله ېې انکار ، کله وعده کړله

شپون شودخیال دښته کې طالب الهام
جوړه دې یادو ورته رمه کړله