د اجراييه ریاست ویاند: ریاستي نظام د هېواد د ټولو جنجالونو جرړه جوړوي

نن ټکی اسیا (چهارشنبه، ۲۷ مرغومي، ۱۳۹۶ل): د اجراييه ریاست ویاند پر ولسمشر د نیوکو په لړ کې په هېواد کې ریاستي نظام د جنجالونو جرړه بولي.

مجیب الرحمن رحیمي، د اساسي قانون د کالیزې په مناسبت په ویاړغونډه کې وویل، چې اساسي قانون ولسمشر ته دومره واک ورکړی دی، چې زورواکۍ او جنجالونو ته يې لار هواره کړې ده.

رحیمي اجراییه ریاست د دې خنډونو په لرې کولو کې پر هڅو بوخت وګاڼه او ويې ویل دوی په تېرو دریو کلونو کې کې هڅه کړې چې په اداري برخو کې سمون راولي.

په ورته وخت کې د عبدالله عبدالله او محمد اشرف غني تر منځ د شوې هوکړې د تطبیق کمیسیون غړی هم ولسمشر غني پر وحشت تورنوي.

محمد ناطقي وايي، چې په دې کمیسیون کې د دریو کلونو په تېرېدو سره یوازې د اجراییه ریاست اړوند کسان کار کوي او ارګ تر اوسه ورته خپل غړي نه دي معرفي کړي.

د هغه په خبره اوسني اساسي قانون او ریاستي نظام ولسمشر ته دومره واک ورکړی چې صلاحیت يې فوق العاده او وحشت ناک ښکاري.

دا په داسې حال کې دی چې د ارګ او جمعیت په ناندریو کې هم د جمعیت یوه کلکه غوښتنه همدا ده چې باید نظام بدل کړل شي.

دوه ورځې وړاندې د جمعیت اسلامي د مشرتابه شورا غړي محمد اسماعیل خان وویل، د دوی له ارګ سره خبرې بې پایلې تمامې شوې دي، خو د عطامحمد نور پر والیتوب او د نظام پر بدلون د دوی ټينګار دی.

ارګ تر اوسه د اجراییه ریاست د دې څرګندونو اړوند څه نه دي ويلي.