طالبانو پر کانټينيټل هوټل د بريد مسؤليت ومانه
نن ټکی اسیا (یکشنبه، ۰۱ سلواغې، ۱۳۹۶ل):تېره شپه نهه بجې په کابل کې پر انټرکانټينينټل هوټل ډله یيز سرتيري بريدونه پيل شول.
د فرانس پريس خبري اژانس په وينا د برید هدف هغه کنفرانس و چې له ناټو ځواکونو دولتي عسکرو ته د مسؤليت د لېږد په موخه جوړ شوی و.
طالبانو هم منلې چې د بريد اهداف يې بهرني او داخلي لوړ پوړي چارواکي او سرتيري وو.
طالب ویندوی نن ټکي اسیا ته په را لېږلې خبرپاڼه کې ويلي چې بريد د دوی ۵ تنو ملګرو (بلال، ایوبي اوخلیل د کندهار، بشر د فاریاب او عبید د غور ولایت اوسیدونکو) چې په سپکو او درنو وسلو سمبال وو د خاصو تکتیکونو په کارولو کړی.
ذبیح الله مجاهد وايي سرتیرو بريدګرو د مشرانو له لارښووني سره سم د بهرنيو هیوادونو اتباع له سم تشخيص وروسته په نښه او وژل.
خبرپاڼې دغه راز د سرتيرو بل هدف هغه داخلي چارواکي بللي چې له امريکايانو سره يې په غونډه کې ګډون درلود.
تر اوسه د دغه بريد له امله د اوښتې مرګ ژوبلې کره شمېر نه دی څرګند شوی، خو د روغتيا وزارت سرچينې وايي، چې تر اوسه دوی ته د څلوېښتو کسانو د مرګ ژوبلې خبر رسېدلی دی.
رویټرز خبري اژانس د کانټيننټل هوټل د مدير حارث نایاب له خولې ليکلي، چې بريدګرو د هوټل په پخلنځي کې سنګر نیولی و او له هغه ځايه يې په هوټل کې د ننه ډزې کولې او همدا راز يې له هغه کومکي دولتي عسکرو سره هم جګړه کول چې د دوی د مخنيوي په موخه راتلل.
هغه مهال چې د بريد نژدې لس ساعتونه پوره کېدل د کورنيو چارو وزارت سرپرست وياند نصرت رحيمي وویل، چې د هوټل په درېيم او څلورم پوړ کې د بريد کوونکو او عسکرو تر منځ جګړه روانه ده او د بهرنيانو په ګډون کورني مېلمانه په جګړه کې یرغمل دي.
ځايي رسنيو ته د پيښي عيني شاهدانو ويلي چې سرتيرو بريد ګرو به خارجي اتباع له داخلي اتباعو جدا کول او وروسته به يې یو، يو وژل.
د طالبانو خبرپاڼې ليکلي: «دغه بریدونه د تیرې جمعې شپې ته پلان شوي وو، خو هغه مهال په هوټل کې د واده مراسم ترسره کیدل او د ملکي خلکو د ازدحام له امله د عملیاتو اجازه ورنه کړل شوه.»
طالبان مني چې د کانټينينټل هوټل بريد وروسته له ۱۴ ساعتونو پای ته رسېدلی خو د خپلو سرتيرو د مرګ ژوبلي اړوند يې څه نه دي ويلي.
بهرنيو او داخلي ځواکونو د خپلو تلفاتو وروستۍ کره شمېرې نه دي په ډاګه کړي.
