fbpx

امریکايي جنرال: په افغانستان کې بمباري نوره هم زیاتوو

نن ټکی اسیا (پنجشنبه، ۵ سلواغې، ۱۳۹۶ل): امریکايي ځواکونه، چې د افغانستان د شپاړس کلنې جګړې په موده کې یې د موربم تر کچې بمونه غورځولي، په دې هیواد کې د لا زیاتو هوايي بریدونو او بمباریو خبر ورکوي.

په افغانستان کې د ناټو هوايي ځواکونو قومندان (جنرال جیمز هیکر) وايي چې امریکايي او افغان هوايي ځواکونه به په افغانستان کې د بمباریو کچه نوره هم پراخوي او طالبانو ته به خپل پوره زور وروښيي.

نوموړي جنرال تېره ورځ د کندهار په هوايي ډګر کې د خپلې وینا پر مهال، امریکايي او افغان سرتیري دواړه د همسنګرو دوستانو په ردیف کې یاد کړل او زیاته یې کړه: «امریکايي او افغان هوايي ځواکونو تر اوسه خپل پوره زور طالبانو ته نه دی ورښکاره کړی».

امریکايان وايي چې تازه یې افغانستان ته د جګړې لپاره A-10 ډوله الوتکې رالیږدولي دي. دا هغه الوتکې دي چې د سوریې او عراق په جنګونو کې یې د امریکا په ګټه بمباري کړې، او امریکایان یې له درنو تلفاتو څخه خوښ او راضي دي، نو ځکه یې په افغانستان هم ولورولې.

د دغو الوتکو په کمالاتو کې ویل کیږي چې تر ۹۰۰ کیلوګرامه زیات درانه بمونه غورځولی شي.

امریکايي جنرال جیمز هیکر، په افغانستان کې جګړې ته د افغان عسکرو د تشویق په لړ کې وویل: «د نویو جنګي تجهیزاتو په رارسیدو او د افغان ځواکونو د جنګي وړتیا په لوړېدو سره به، په افغانستان کې هوايي بریدونه او بمباري دومره شدت ومومي چې د طالبانو سترګې به له ډیرې وېرې په اسمان ګنډلې وي».

یاد امریکايي جنرال په خوښۍ سره زیاته کړه چې په تېر ۲۰۱۷ کال کې يې ۴۰۰۰ بمونه د افغانستان په خاوره غورځولي دي.

امریکايي جنرال دا ونه ویل چې څومره نور اضافي وخت او بمونو ته اړتیا ده چې د افغانستان په خاوره وغورځول شي او طالبان ختم کړي، خو د ګډ حکومت ولسمشر اشرف غني تېره اونۍ له یو امریکايي تلویزون سره په مرکه کې ویلي و چې «تر نسلونو نسلونو پورې» د جګړې حوصله لري.

امریکایانو په تېرو شپاړس کلونو کې په هوايي بریدونو او بمباریو کې له سلهاوو زرو افغانانو ژوند اخیستی. د واټسن امریکايي انسټیټوټ د څیړنې پر اساس، امریکایانو یوازې په لومړنیو څوارلس کلونو کې تر ۱۵۰زره (یو نیم لک) زیات افغانان وژلي او تر دې زیات یې ټپیان کړي دي.

avatar
  ګډون وکړئ  
خبرتیا غوښتل د