آمنت : ما ایمان راوړی دی( زه باور لرم)

ليکنه : احمدجنید مبارز

سوال : عقیده څه ته وایي؟
جواب : عقیده لفظاً تړلو ته وایي او د دین او مذهب سره اړوند، هغه کلک باورونه چي په زړه کي یوځای سي هغه ته عقیده ویل کیږي.

سوال : عقیده څه اهمیت لري؟
جواب : عقیده د انسان د ټولو اعمالو د بنسټ اهمیت لري، ځکه چي د انسان د ټولو اخلاقو او اعمالو بنیاد پر اراده ولاړ دی او اراده د زړه سره اړه لري، معلومه خبره ده چي زړه د هغو شیانو اراده کوي چي په زړه کي یوځای سوي وي. په دې وجه د انسان د اعمالو او اخلاقو د صحیح کېدو لپاره لازمي ده چي د هغه په زړه کي صحیحه عقیده وي، له دې سببه د عقیدې صحت ډېر ضروري او لازمي دی او د عقیدې د خرابېدو په صورت کي اعمال لغوه کیږي.

سوال : ایمان څه ته وایي؟
جواب : ایمان د زړه تصدیق (منلو) نوم دی او د زړه د تصدیق اقرار په ژبه سره کول ضروري دی، ځکه د دنیا احکام پر ظاهر باندي اجراء کیږي او د زړه د تصدیق علم (معلومات) د الله تعالی ماسوا بل هیچاته نه کیږي.

سوال : ایمان او عقیده څه فرق لري؟
جواب : د ایمان لپاره په ژبه اقرار کول شرط دی او عقیده عامه ده، که په ژبه اقرار وکړي او که یې ونه کړي عقیده لرونکی ورته ویل کیږي.

سوال : د ایمان څو رکنونه دي؟
جواب : ایمان اووه رکنونه لري :
۱_ پر الله تعالی باندي ایمان راوړل.
۲_ د هغه تعالی پر ملائکو ایمان راوړل.
۳_ د هغه تعالی پر کتابونو ایمان راوړل.
۴_ د هغه تعالی پر رسولانو ایمان راوړل.
۵_ د اخرت پر ورځ ایمان درلودل.
۶_ پر تقدیر ایمان راوړل.
۷_ وروسته تر مرګ راپورته کېدلو ایمان درلودل.

سوال : اسلام څه ته وایي؟
جواب : د الله تعالی او د هغه د رسول صلی الله علیه وسلم پيروي کولو ته او پر هغه یقین کولو ته اسلام وایي، د دغو ټولو چارو کوونکۍ او عملي کوونکۍ مسلمان بلل کیږي.

سوال : د اسلام ارکان او بناوي څو دي؟
جواب : د اسلام ارکان یا بناوي پنځه دي :
۱_ د توحید او رسالت په ژبه اقرار کول او په زړه یې تصدیق کول او په ژبه یې د توحید کلمه طیبه ویل.
۲_ لمونځ کول.
۳_ زکات ورکول.
۴_ روژه نيول.
۵_ حج کول.
څوک چي دغه پنځه بناوي په ښه ډول عملي کړي، په هغه اندازه یې د اسلام د منلو اساس ټینګیږي.

سوال : ایمان او اسلام څه فرق سره لري؟
د لغت له مخي یې فرق دا دی، چي الله تعالی او د هغه رسول چي څه فرمایلي وي، په همهغه ډول په زړه سره تصدیق کولو ته ایمان ویل کیږي. بل دا چي د ایمان ځای زړه دی او د اسلام ځای زړه او جسم دواړه دی؛ اسلام ښکاره وي او ایمان پټ وي. دوی پخپل ذات کي د شریعت له نظره فرق نه لري، ځکه ایمان بېله اسلامه نسي موجودېدای او اسلام بېله ایمانه نسي موجودېدای، دواړه یو له بل سره لازم او ملزوم دي او یو تر بلت نسي جلاکېدای.

سوال : دین څه ته ویل کیږي؟
جواب : دین په لغت کي هغي طریقې یا قانون ته ویل کیږي، چي د هغه پیروي کیږي، که هغه صحیح وي که غلط، او د اسلامي شریعت په اصطلاح کي د الله تعالی هغي مقرري طریقې ته ویل کیږي چي بنده پخپله خوښه خپله کړې وي.

سوال : شریعت څه ته ویل کیږي؟
جواب : د الله تعالی د لوري د بنده ګانو لپاره چي کوم اعتقادي او عملي احکام مقرر سوي دي دغو احکامو ته شریعت ویل کیږي.

سوال : موږ د چا پیروان یو، د چا امتیان یو، او د چا مذهبیان یو؟
جواب : موږ د الله تعالی د دین پیروان یو، د سیدالمرسلین حضرت محمد صلی الله علیه وسلم امتیان یو او د حضرت امامنا الاعظم ابو حنیفه رحمه الله تعالی مذهبیان یو.

ماخذ : [تعلیم العقائد صـ ۵_۶_۷_۸_۹ ۱۳_۱۴]

avatar
  ګډون وکړئ  
خبرتیا غوښتل د