طالبانو د «ټاپي» په اړه خپله همکاري او اندیښنه څرګند کړل

نن ټکی اسیا (جمعه، ۰۴کب، ۱۳۹۶ل): طالبانو د ټاپي پروژه د هیواد لپاره یوه مهمه اقتصادي پروژه ګڼلې او هغه یې د افغانانو لپاره «ښه زیری» بللی. خو په عین حال کې يې اندیښنه څرګنده کړې چې ښايي امریکايي «اشغالګر» یې په وړاندې غیر مستقیم خنډونه ایجاد کړي.

په همدې تړاو د طالبانو په اعلامیه کې راغلي چې د ټاپي پروژې د بنسټ ډبره د دوی د حکومت پر مهال ایښودل شوې او اوس هم د خپل واک په ساحه کې له دې پروژې سره خپله ملاتړ او همکاري اعلانوي.

طالبانو په تېره یوه نیمه لسیزه کې د ټاپي پروژې د ځنډ لامل «امریکايي اشغال» بللی او اوس هم یادې پروژې ته د امریکایانو له ضرر څخه ډاډمن نه ښکاري او زیاتوي چې امریکایانو ته هیڅ هغه پروژه د زغم وړ نه ده چې ګټه یې افغانانو ته رسیږي.

«دا چې یاده پروژه یوه خالصه اقتصادي او صنعتي پروژه ده او اشغالګرو امریکایانو ته پکښې کوم اقتصادي او یا پوځي مصلحت په لاس نه ورځي نو کیدای شي امریکایان د خپلو شومو موخو له مخې د دې پروژې په وړاندې داسې غیر مستقیم مزاحمت ایجاد کړي لکه چې د مس عینک د پروژې په مقابل کې یې ایجاد کړی، چې د یادې پروژې د استخراج قرار داد په ۲۰۰۸ کال کې د چین هیواد له(MCC) کمپني سره تر سره خو عملي کار یې تر اوسه ځنډیدلی دی».

طالبانو نه یوازې دا چې د ټاپي پروژې د ملاتړ او همکارۍ ډاډ یې ورکړی، د کابل په حکومت کې یې د پراخ فساد او درغلیو کچې ته په اشارې ویلي چې په یاده پروژه کې به د «رژیم چارواکو» د ممکنه درغلیو او فساد مخنیوی هم کوي.

طالبانو ویلي چې باید د ټاپي پروژې د حفاظت لپاره داسې ګامونه واخیستل شي چې د امریکايانو د ضرر د مخنیوي تضمین وکړي. اعلامیه زیاتوي:

«اسلامي امارت د کابل له رژیم پرته د ټاپي پروژې نورو اړونده جهتونو ته وړاندیز کوي چې د پروژې تر پیل وړاندې د ملګرو ملتونو سازمان او یا کوم بل معتبر سازمان په وسیله له امریکایانو څخه د یادې پروژې د عدم تخریب او مصؤنیت تضمین واخلي ، کنه لیري نه ده چې یاده پروژه هم تر پیل وړاندې د مس عینک مهمې پروژې په څیرد امریکايي مزاحمت له امله له خنډ سره مخ شي».

طالبانو د اعلامیې په پای کې یو ځل بیا په نړیوالو مرستندویه جهتونو غږ کړی چې د هیواد په بیارغونه او اقتصادي پروژو کې د افغانانو لاسنیوی وکړي او په دې برخه کې یې له خپل اړخه د هر راز مرستو او همکاریو اطمنان ورکړی.