کندهار : طالبانو د روزګان د والي وياند ژوندی نيولی

نن ټکی اسیا (چهارشنبه، ۰۹کب، ۱۳۹۶ل):پرون ماپښين د کندهار ـ روزګان پر لویه لار په شاوليکوټ ولسوالۍ کې طالبانو د ځانګړي تکتيک له مخي د روزګان د والي وياند او ۱۹ پولیس ژوندي نيولي.

د کندهار امنیه قومندان جنرال رازق د پيښي پخلی کړی او په وينا د هغوی د ژغورني په پار يې په سيمه کې عملیات پيل کړي.

طالبانو منلې چې د شاوليکوټ ولسوالۍ په اردو بلاغ سيمه کې يې ۱۷ تنه پولیس او د روزګان د والي وياند نيولي.

د طالبانو په وينا وياند او ۱۷ تنه عسکر چې غوښتل يې د ۴ موټرو په مرسته سفر وکړي د دوی د ځانګړو استخباراتي معلوماتو له مخي يې په لومه کې ښکېل شوي.

دوی وايي نيول شوي کسان او وسائط يې تر خپلو خوندي ځايونو رسولي ، همدار راز يې د نیول شويو کسانو دوسيې خپلو شرعي محاکمو ته سپارلي.

د کندهار د امنیه قومندانۍ وياند دراني ويلي چې د نيول شويو کسانو د ژغورني په عملیاتو کې ۱۱ پولیسو ته مرګ ژوبله اوښتې.

دولتي چارواکو لا هم د روزګان والي ویاند د نیولو اړوند څه نه دي ويلي.