له ښه خوب کولو وروسته بیا هم د نارامۍ احساس کوئ، لامل یې څه دی؟

نن ټکی اسیا (جمعه، ۱۸ کب، ۱۳۹۶ل): د شپې لخوا مناسب، ښه او ارام خوب د روغتیا ضمانت کوي، چې انسان په ذهني توګه روغ او له جسماني انرژۍ څخه پوره ساتي، خو دا هم ممکنه ده چې د شپې خوب کولو سربېره هم انسان د ورځې په اوږدو کې د ښې روغتیا او ارامتیا احساس نه کوي.

په عام ډول د شپې لخوا له شپږو څخه تر اته ساعتونو پورې خوب د روغتیا لپاره هم ښه دی او پر بدن بوج هم نه محسوسیږي، خو کله کله داسې هم کیږي چې انسان له ۶ څخه تر ۸ ساعتونو خوب سره بیا هم د نارامۍ او پر سر د بوج احساس کوي، ددې لاملونه څه دي؟

په خوب کې خراټې وهل

د شپې لخوا په خوب کې خراټې وهل، چې په طبي اصطلاح ورته Sleep apnea ویل کیږي، دا په داسې حال کې منځ ته راځي چې انسان د شپې لخوا ویده وي او په سمه توګه ساه نشي اخیستلی، ددې مقصد دادی چې دماغ او بدن ته په سهي توګه آکسیجن نه رسیږي، او په بدن کې د هوا تګ راتګ په سمه توګه نه ترسره کیږي.

دغه عمل یو ځل نه بلکې څو څو ځله ترسره کیږي چې له امله یې دماغ په سخت ټکان سره راویښیږي، او بدن په ساه اخیستلو مجبوري تر څو د آکسیجن کچه سمه شي، کله چې د شپې لخوا دغه کار په تکراري ډول ترسره شي، نو د سهار پر وخت او یا د ورځې په اوږدو کې انسان د ستړیا او نا ارامۍ سره مخ وي.

له وېده کېدو وړاندې د کافیین استعمال

د وېده کېدو نه وړاندې کافیین (چای، کافي، قهوه) د بدن برخه ګرځول روغتیا لپاره ستر ګواښ دی، چې انسان د شپې لخوا څو څو ځله تشناب تللو ته اړ کوي، په داسې حال کې د بدن اوبه کمیږي، او کله چې سهار له خوبه راپاڅي نو د ستړیا او بد مزاجۍ احساس کوي.

مبایل یا بل برقي وسایل استعمالول

ځیرک مبایل، ټیبلیټ، لیپټاپ، کمپیوټر او یا داسې نورو برقي وسایلو څخه چې کومه رڼا خارجیږي، پر بدن او سترګو بد اغیز کوي او خوب خرابوي، چې د شپې لخوا انسان ویده وي خو په حقیقت کې د ارامتیا او سکون احساس نه کوي.

د امریکې هارورډ پوهنتون د یوې څیړنې پر اساس، له دغو وسایلو څخه راوتلې رڼا پر میلاټونین «Melatonin» بد اغیز کوي (میلاټونین د انسان په بدن کې داسې کیمیاوي مواد دي چې په ښه او ارام خوب کې مرسته کوي)، ددې حل لاره داده چې ددغو وسایلو استعمال د خوب نه دوه ساعته وړاندې پریښودل شي.

د خوب پر مهال غاښونه کرپول

شاید انسان ته دا معلومات نه کیږي چې دی د خوب پر مهال کوم اعمال او حرکتونه ترسره کوي، همداسې یو عمل، چې انسان د شپې خوب کې خپل غاښونه یو له بل سره وهي، سولوي او کرپوي، چې پخپله یې ده ته اندازه نه کیږي خو په حقیقت کې دده د خوب اصلي ګټې له منځه وړي، همدا حرکت د انسان د هډوکو او د غاښونو د درد لامل ګرځي.

په دې سره د ساه اخیستل او په بدن کې د هوا ګرځېدل اغیزمن کیږي او په سمه توګه آکسیجن نه وررسیږي، چې له امله یې په شپه کې په تکراري ډول راویښیږي، او اغیز یې سهار له راپاڅېدو وروسته ښکاره کیږي.

له خوب نه وړاندې ورزش کول

ورزش که څه هم د انسان بدن ته یو شمېر ګټې لري، خو که همدغه ورزش د خوب نه دوه یا درې ساعته وړاندې ترسره شي، د شپې لخوا خوب زیانمنوي، ځکه چې دا د هورمونو hormone cortisol کچه لوړوي او د میلاټونین کچه ټيټوي (کومه چې په ښه خوب کې مرسته کوي)، له همدې امله د ښه خوب کیفیت هم کمزوری کوي.

تلویزون کتل

او همدا ډول په یاد ولرئ چې د شپې لخوا د څو ساعتونو لپاره تلویزون کتل هم د خوب خرابوالي لامل ګرځي، ځکه چې خوب له ډيرې ناستې او همداسې ملاستې نه وروسته خپل طبیعتي سکون له منځه وړي، او د تلویزون کتلو سره انسان له دغه عادت سره اشنا کیږي.

په کار ده چې له خوب وړاندې تازه هوا ته څو قدمه واخلئ او بیا په خپل بیستر پریوځئ، هم به مو خوب ارام وي او هم به سبا ورځ کوم بوج او ستړیا نه محسوسوئ!