د زړه دروازه

عرفان الله عرفاني

زړه تـه مې د زړه دروازه خلاصه کړه!
راشه ورتـه تــه دروازه خلاصه کــړه!

ډېر دی ستړی کړی د بېلتون دښتو
لږ چې شي ویــده دروازه خلاصه کړه

ناست دی د کــلا د دېوال سیوري ته
غـواړي لــــږ اوبه دروازه خلاصه کړه

ستا تصویر مې سترګو کې ساتلی دی
زار دې شـــم باڼه دروازه خلاصه کړه

ګوره د مېلمه قــــدر بــه ډېر کوې
ټول یــــو پښتانه دروازه خلاصه کړه

پام چې عرفانـــــي رقیب ته پړ نکړې!
راغی پـــر کــوڅه دروازه خلاصه کړه

avatar
  ګډون وکړئ  
خبرتیا غوښتل د