افغانستان

غزني: د ۸۲۰ ملکي وګړو د مرګ ژوبلې ګوته یو بل ته نيول کېږي

نن ټکی اسیا (یکشنبه، ۱۲وری، ۱۳۹۷ل): د غزني د عامې روغتيا مسوولین وايي، چې په تېر ۱۳۹۶لمريز کال کې د دې ولایت په ګوټ ګوټ کې د دوی د ‏شمېر له مخې ۸۲۰ تنو ملکي وګړو ته مرګ ژوبله اوښتې ده‎. ‎

د عامې روغتیا رییس ډاکټر نېکمل پرون ازادي راډيو ته ويلي، چې د تېر کال په جګړو کې ۱۸۰ تنه ملکي وګړي ‏وژل شوي او ۶۴۰ نور ټپیان شوي دي‎. ‎

د جګړې له امله د دې وژل شوی او ټپیانو چې پکې مېرمنې او ماشومان هم شامل دي، د ملامتۍ ګوته د جګړې ‏دواړه اړخونه یو بل ته نیسي‎. ‎

د غزني د والي ویاند محمد عارف نوري دعوه کوي چې په دې مرګ ـ ژوبله کې دولتي قواوې یوازې شل سلنه ښکېلې ‏او په وينا يې ۸۰ سلنه ملامتي د طالبانو پر غاړه ده‎. ‎

ازادي راډيو د طالب ویاند ذبیح الله مجاهد له قوله وايي، چې د دوی ځواکونو د ملکي تلفاتو کمښت ته جدي ‏پام کړی او په وینا يې په غزني کې د ملکي مرګ ژوبلې ۹۰ سلنه پړه د دولتي ځواکونو پر غاړه ده‎. ‎

د تېر میلادي کال په وروستیو کې د امریکا د ولسمشر ټرمپ له لوري د نوې ستراتېژۍ له اعلان سره سم، د ‏هېواد په ګوټ ګوټ کې هوايي بریدونه ډېر شول، چې ورسره د ملکي تلفاتو کچه هم لوړه شوه‎. ‎

د تېر لمريز کال په وروستیو کې د غزني ښار ته څېرمه په منګور سیمه کې او د دې ولایت په ده یک ولسوالۍ کې د ‏بمبار له امله شاوخوا ۱۲ ماشومانو ته مرګ ـ ژوبله واوښته، چې پخواني ولسمشر حامد کرزي پرې هم ‏خواشيني ښکاره کړه‎. ‎

یاده دې وي د غزني ښار د ۱۳۹۶ کال په کب میاشت کې د اربکيانو پر ضد د هغه پراخ یو اوونیز لاریون شاهد ‏و، چې ګډونوالو يې د قره باغ په شیر اباد کې د وژل شویو کسانو د قاتلینو د محاکمې غوښتنه کوله‎. ‎

ghaznilaruon-hindu1
غزنی؛ د تېرې کب میاشتې په وروستیو کې د اربکیانو پر ضد د لاريون یوه څنډه

لاریون کوونکو په سیمه کې اربکیان پر دې ملامتول، چې د محمد ابراهیم په نوم د یو تن ملکي وګړي پر کور يې د ‏چاپې په مهال یو ماشوم، یو ځوان او یوه مېرمن ځای پر ځای ووژل او دوه نور يې ژوندي یووړل‎. ‎

د غزني د عامې روغتیا د شمېر له مخې په تېر لمریز کال کې ۱۵۹ ځوانان، ۱۲ مېرمنې او ۹ ماشومان وژل شوي ‏دي؛ ۵۳۶ تنه ځوانان، ۶۵ مېرمنې او ۳۹ ماشومان ټپیان شوي دي.‏

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
Would love your thoughts, please comment.x
()
x