fbpx

د پاکستان د بهرنیو چارو وزارت مرستیاله کابل ته راغله

نن ټکی اسیا (دوشنبه، ۱۳وری، ۱۳۹۷ل): په کابل کې د پاکستان سفارت د مطبوعاتي ادارې له لوري په خپره شوې خبرپاڼه کې ویل شوي، چې د یاد هېواد د بهرنیو چارو وزارت مرستیاله د یوه پلاوي په مشرۍ نن کابل ته رارسېدلې ده.

په خبرپاڼه کې د بهرنیو چارو وزارت د مرستیالې تهمينه جنجوعه راتګ د کابل ـ اسلام اباد د اړیکو ښه کول ښودل شوي.

مېرمن جنجوعه په ارګ کې له افغان چارواکو سره لیدلي او د پاکستان د لومړي وزیر شاهد خاقان عباسي د سفر په اړه یې هم خبرې کړي دي.

ټاکل شوې چې د راتلونکي جمعې په ورځ د پاکستان لومړی وزیر شاهد خاقان عباسي کابل ته د ولسمشر غني په رسمي بلنه راشي او د دواړو هېوادونو د اړیکو په ښه کېدو به سره خبرې وکړي.

د پاکستان د بهرنیو چارو وزارت مرستیاله داسې مهال کابل ته سفر کوي، چې نن د کونړ ځايي چارواکو ویلي وو، چې له تېرې شپې راهیسې پاکستانیو پوځیانو یو ځل بیا پر کونړ ۱۵۵ توغندي توغولي دي.

د کابل ـ اسلام اباد اړیکې وروسته له هغه نورې هم ترینګلې شوې، چې تېر کال په کابل کې طالبانو څو بریدونه وکړل او افغان چارواکو یې پړه پر پاکستان واچوله.

avatar
  ګډون وکړئ  
خبرتیا غوښتل د