کندز پېښه (نظم) / خیرخوا

هغوی سر د حسین پرې کړ دښمني وه
دلته غاړې پرې کوونکي طبع زمايي

هغوی سر د حسين پرې کړ لاړل ورک شول
دلته خاندي د خوښۍ سندرې وايي

د هغه شَمَر د سترګو شرم و چې
د کوفې لارو کوڅو کې چا ونه ليد

د هغه شَمَر په سترګو کې حيا وه
چې په ښار او بانډو کې چا ونه ليد

د دې عصر شمران بې سترګو خلک
په ښکاره نارې وهي چې ما وژلي

د دې عصر شَمَران له حيا پاک دي
جوړوي پر هره سيمه کَکَر څلي

د هغه شَمَر يزيد وايي خفه و
د هغه شَمَر يزيد وايي ژړلې

د هغه شَمَر يزيد بې پته نه و
د هغه شمر يزيد ښځې ژغورلې

راشه اوس د دې بې پتو چاره ګوره
چې مرګه مخکې پت درڅخه واخلي

پر حريم دې غلبله کاندي درجوړه
بيا دې وژني چې عزت درڅخه واخلي

ای د ننګ او د غيرت پامته دارانو
د کوفې او د بصرې وګړي نه شئ

چې يې سر د حسين وسپاره شَمر ته
په ژونديو ناحسابه مړي نه شئ

ای د ننګ او د غيرت پامته دارانو
يو تکبير يوه ناره د غزا غواړي

سرسپارلي لېوني زلمي په کار دی
تُنده ګرمه نغاره د غزا غواړي

ای راځئ چې عاقبت يې رب ته پرېږدو
تورې پورته کړو د زغرو غم کې نه شو

غزاګانو ته د مرګ په تمه لاړ شو
د نړۍ نړۍ لښکرو غم کې نه شو