د کندوز آهونه! 

نظام کندهاری

ټکور کړه په خپل رحم پرهرونه د کندوز

څښتنه ته خو اورې فريادونه د کندوز

محفل د خوشحالۍ يې په ماتم باندې بدل شو

په وينو لمبېدل چې سپين ګلونه د کندوز

وحشت يې چې غوټۍ د هيلو وسوې په لمبو کې

شول خاورو سره خاورې ارمانونه د کندوز

نارې چې د بشر او د حقوقو وهي څه شول؟

نن ولي څوک نه اوري آوازونه د کندوز؟

خونخوار جهان زمونږ له ګرمو وينو هم خوند اخلي

له چا سره شريک کړمه دردونه د کندوز؟

باران د تړمو اوښکو پر ګرېوان يې راووريږي

نظام چې اورېدلي دي آهونه د کندوز