افغانستان

پنټاګون: د امریکايي ځواکونو تلفات ډېر شوي

نن ټکی اسیا (چهارشنبه، ۲۲وری، ۱۳۹۷ل): د امریکا د دفاع وزارت وايي په افغان جګړه کې يې د طالبانو پر ضد جګړه تونده کړې چې ورسره د دوی د عسکرو تلفات هم ډېر شوي دي.

امریکايي رسنۍ د پنټاګون په حواله وايي چې په تېر یوه کال کې په مخامخ جګړو کې ۴۱ خو په هوايي الوتنو کې ۴۷ تنه وژل شوي دي.

د سرچينې په حواله په هوايي الوتنو کې د امریکايي چورلکو په نښه کېدو، تخريبېدو او لوېدو له امله پورته شمېر تلفات ور اوښتي دي.

د امریکا دفاع وزارت وايي، په هوايي بریدونو کې يې هم ډېروالی راوستی دی، چې یوازې د روان کال په فبروري میاشت کې ۴۶۹ هوايي بریدونه کړي دي.

د امریکايي رسنيو په حواله امریکايي پوځي چارواکي غواړي، په لږو عسکرو لوی عملیات پر مخ یوسي، ځکه خو پر هوايي بریدونو تکیه کوي.

د امریکا د نوې ستراټېژي له اعلان وروسته د دې هېواد د ځواکونو په هوايي بریدونو کې خورا ډېروالی راغلی دی.

په تېر کال کې د جګړې په ۴۶۰۳ پېښو کې ۴۳۶۱ هوايي بریدونه دي، له ۲۰۱۴ میلادي کال راهیسې د امریکايي سرچينو په حواله ټولو ۱۲۸۹۷ پېښو کې ۲۳۶۵ هوايي بریدونه دي، چې ډېر زیان يې ملکي وګړو ته اوښتی دی.

د پنټاګون تر دې معلومات دوه ورځې وړاندې ډونالډ ټرمپ استخباراتي او پوځي چارواکو ته امر کړی، چې د جګړې پر وخت د ملکي تلفاتو پروا ونه کړي.

د تېر میلادي کال د اګست میاشتې له لومړیو د روان کال د دویمې میاشتې تر وروستیو پورې پر افغان خاوره ټول ۳۲۲۴ بمونه اچول شوي دي، چې پر دې حساب هره ورځ تر ۱۵ ډېر بمونه اچول شوي دي.

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
Would love your thoughts, please comment.x
()
x