خدايه ما تلويزون کړې

ژباړه: غنچه ګل ارمان

ښوونکې د لومړني ښوونځي له زده کوونکو وغوښتل چې په دې اړه يوه لنډه ليکنه وکړي چې دوی له خدایه څه غواړي.

کله چې کور ته راغله او د زده کوونکو کورنۍ دنده يې کتله، د يوه زده کوونکي د ليکنې په لوستلو يې په سترګو کې اوښکې ډنډ شوې. په دې وخت کې يې کور ته ميړه را ننوت. هغه ترې وپوښتل چې ولې ژاړې؟

هغې ور ته وويل چې دا وګوره يوه زده کوونکي داسې ليکنه کړې.

زده کوونکي ليکلي وو:

خدايه، نن ماښام در نه دا يوه غوښتنه لرم چې ما تلويزون کړه. زه غواړم چې د تلويزون په څېر شم چې په کور کې ځانګړی ځای ولرم، چې کورنۍ مې خوا او شا ناسته وي، او زما خبرو ته يې غوږ نيولی وي، چې د هغوی د پام وړ وګرځم او همدا ما ته ګوري. غواړم چې پلار مې را ته وګوري که څه هم چې له کاره ستړی راغلی وي.

غواړم چې د مور مې را ته پام وي که څه هم چې د کور په کار کې ستړې وي. غواړم چې خويندې او وروڼه مې را باندې يو له بله مخکې شي چې ما وګوري. غواړم چې کورنۍ مې هر څه پريږدي او لږ وخت ما ته راکړي. خدايه غواړم چې د هغوی د خوښۍ لامل شم. خدايه نور څه نه غواړم، يوازې دا غواړم چې ما تلويزون کړې.

سړي چې دا ليکنه ولوسته، سر يې وخوځاوو او ويې ويل چې دغه بېچاره ماشوم له بدې ورځې دا دُعا کړې. څه ظالمان مور او پلار يې دي. دې خوار ته لکه چې هېڅ وخت نه ورکوي.

په دې کې ښځه بيا په ژړا شوه او ويې ويل:

دا زما او ستا زوی ليکلي!!!

درس

مونږ، ښځې او سړي، د کور والا او د کار والا، اوس هغه پخواني ميندې او پلرونه نه يو چې له بچيانو سره به يې خبرې کولې، هغوی ته به يې وخت ورکاوو او هغوی ته به يې د مورتوب او پلارتوب مينه او احساس ورکاوو. مونږ زياتره، په ډېرې خواشينۍ سره، اوس د تلويزون ميندې او پلرونه يو، د موبايل او کمپيوټر ميندې او پلرونه يو، نه د خپلو بچيانو.

راځئ، خپلو بچيانو ته، خپلو ميندو او پلرونو ته، خپلو خويندو او وروڼو ته، خپلو خپلوانو ته، او خپلو مېلمنو ته د تلويزون له پردې او د موبايل او کمپيوټر له شيشې ګوښه يو څه وخت ورکړو. راځئ د خپلو بچيانو ميندې او پلرونه شو، نه د خپلو تلويزونونو او موبايلونو. راځئ لږ د مور او پلار مخ ته وګورو، راځئ لږ د خپلو بچيانو مخ ته وګورو.

avatar
  ګډون وکړئ  
خبرتیا غوښتل د