fbpx

‏چې نه کار هلته څه کار؟

ژباړه: غنچه ګل ارمان

يو هوښيار وايي چې تر اوسه هيچا په خبرو کې نه يم مات کړی، مګر يوې ماشومې.

وايي چې پر لارې روانه وه او يو سرپټی لوښی يې پر اوږه ايښی وو. ترې ومې پوښتل چې په دې لوښي کې څه شی دي؟

هغې وويل: دا سر مې يې نو د څه له پاره پټ کړی؟

وايي چې په دې ځواب يې سخت خجالت کړم!

درس:

سړی بايد د نورو د ژوند د تفصيلاتو په اړه د پوهېدلو هڅه و نه کړي، په ځانګړې توګه د هغو تفصيلاتو په اړه چې نه يې ګټه ور رسيږي او نه تاوان، او نه پکې دی ور سره څه مرسته کولی شي. د ځينو خلکو عادت وي چې د نورو د ژوند په اړه له اړتيا زيات پوهېدل غواړي. په ټول ژوند کې به يې پنځه وارې ستړي مه شي نه وي ور سره کړي او پوښتنې به ترې د لسو کالو د انډيوال په څېر کوي. ځينې بيا داسې وي چې ښه به هر شی ور ته معلوم وي مګر هسې به د خلکو په مخ کې د سړي ګړول غواړي. تر ټولو بده خو لا دا وي چې ځينې، ځينې دا کار بيا د خلکو په وړاندې د انډيوالۍ د ژورتيا د ثبوت په پار کوي.

د دې تاوان دا وي چې يو خو پوښتل کېدونکی کس يو ډول د حرج احساس کوي، مګر کله، کله داسې هم پيښيږي چې پوښتونکی داسې څه واوري چې د اورېدو هيله يې نه لري. دا ښه عادت نه دی.

البته نور هم بايد د داسې کسانو په مخ کې د داسې موضوع ګانو له مطرح کولو ډډه وکړي چې په اړه يې د دغسې جاسوس-طبيعته کسانو د پوښتنو ځوابولو ته چمتو نه وي.

avatar
  ګډون وکړئ  
خبرتیا غوښتل د