ایراني چارواکي: ډیر ژر به ۱۲۰ تنه افغان بندیان خپل هېواد ته وسپاري

نن ټکی اسیا (سه شنبه، ۲۸وری، ۱۳۹۷ل): د ایران دولتي خبري اژانس ایرنا په کابل کې دخپل سفارت په حواله وایې، افغان حکومت تیره ورځ ۵ تنه ایراني بندیان خوشي کړي نو ایران به هم په نږدې راتلونکې کې ۱۲۰ تنه افغان بندیان خپل هېواد ته وسپاري.

په افغانستان کې دایران سفارت دکونسلي چارو مسوول محسن رضایې یاد خبري اژانس ته وویل، خوشي شوی ایرانی بندیان په کابل کې دحامد کرزي نړیوال هوایې ډګر څخه تهران ته ولیږدول شول.

د رضایي په خبره، د ايراني بنديانو د خوشې کولو په بدل کې به په نږدې راتلونکې کې د دوى حکومت هم ۱۲۰ افغان بنديان خوشې كړي او خپل هېواد ته به يې ولېږدوي.

سرچینه زیاتوي ، شاوخوا دولس کاله وړاندې دایران او افغانستان ترمنځ دبندیانو دتبادلې یو تړون لاسلیک شو چې تر دې دمه ۶۲۰ تنه افغان او ۵۳ تنه ایراني بندیان تبادله شوي دي.

ویل کیږي دغه نیول شوي کسان تر ډيره د نشه یې توکو په تړاو نیول شوې دي.

افغان چارواکو تر اوسه په دې اړه رسنیو ته څه نه دې ویلي.

د یادولو وړ ده چې د ایران په زندانونو کې لاهم سلګونه افغان بندیان موجود دي او څه موده وړاندې یو شمیر رسنېو دایران له لورې په لسګونو افغان بندیانو د اعدامولو خبرونه هم خپاره کړي وو.

avatar
  ګډون وکړئ  
خبرتیا غوښتل د