د را روانو ټاکنو وروستۍ پایلې به دوه میاشتې وروسته اعلانېږي

نن ټکی اسیا (یکشنبه، ۲غويي، ۱۳۹۷ل): د ټاکنو خپلواک کمیسیون وايي د ټاکنو له ترسره کېدو دوه میاشتې وروسته به د ټاکنو وروستۍ پایلې اعلان کړي.

د دې کمیسیون مشر ګلاجان عبدالبدیع صیاد نن په کابل کې خبريالانو ته وویل، د ولسوالیو د شوراګانو او د پارلماني ټاکنو لپاره به د نوماندانو نومونه د جوزا له پنځمې تر ۲۲مې ثبت شي.

د هغه په وینا د زمري په ۱۲مه به د نوماندانو وروستۍ لړلیک رسماً خپور کړي.

هغه وویل د تلې په ۲۸مه به ټاکنې ترسره شي، د لړم په ۱۹مه به يې لومړنۍ او د لېندۍ په ۲۹مه به يې وروستۍ پایلې اعلان شي.

د صیاد په وینا د ولسواليو د شوراګانو د ټاکنو پایلې به تر دې هم وځنډېږي او لومړنۍ پایلې به يې د لېندۍ په ۱۸مه او وروستۍ به يې د دلوې په څلورمه اعلان شي.

د ټاکنو د خپلواک کمیسیون مشر وویل چې د ټاکنو په تړاو شکایتونه به هم په یادو نېټو تر څېړنې لاندې ونیول وشي.

صیاد وړاندې زیاته کړه چې د ولسوالیو د شوراګانو نوماندان به د تبلیغاتو لپاره د تلې له ۱۱مې خو د ولسي جرګې لپاره نومادندان به د تلې له پنځمې د تلې تر ۲۵مې وخت ولري.

هغه د ټاکنو د ناوخته پایلو د ځنډ علت ونه ښود، خو ويې ویل چې دوی هڅه کوي شفافي ټاکنې ترسره کړي او خلک دې پر دوی باور لري.

تبصره وکړه

ستاسو ایمیل ادرس به هیڅ کله نشر نه شي.