افغانستان

حزب اسلامي: نور وخت رارسېدلی چې د شورای نظار خلاف پاڅون وشي

نن ټکی آسیا: حزب اسلامي افغانستان (حمکتیار) په یوه تونده اعلامیه کې په جمعه خان همدرد باندې پرونی برید په سختو ټکو کې غندلی.

د حزب اسلامي په دغه اعلامیه کې راغلي چې د نظار شوری خیانتونه او شرارتونه اوج ته رسېدلي، او هغه وخت رارسېدلی چې په خلاف يې ددوی «مجاهدینِ» پاڅون وکړي او په سیاسي او نظامي ډګر کې يې ټغر ټول کړي.

اعلامیه زیاتوي چې تر څو د نظار شوری بدمعاشان په افغانستان کې وي، دلته امنیت او سوله نشي راتلای. په دغه اعلامیه کې د نظار شوری د پردیو مزدوران او اجنټان ښودل شويدي.

تېره ورځ په بلخ ولایت کې د پولیسو لخوا د حزب اسلامي پخوانی قومندان او د پکتیا والي جمعه خان همدرد باندې هغه مهال برید وشو چې د مزارشریف څخه کابل ته تللو. نوموړی له دغه بریده روغ ووت خو ۴ ساتونکي يې ووژل شول او ۳ نور ټپیان شول.

ددغه برید پړه په شمالي ټلوالې اچول کیږي.

نن ټکی آسیا ته د حزب اسلامي افغانستان (حکمتیار) لخوا دعه اعلامیه رالېږل شوې چې کټ مټ یې نشر ته سپاري:

د حزب اسلامي افغانستان اعلاميه – د شوراى نظار وطن پلورونكي ډلي شرارتونه انتهاء ته رسېدلي

د جمعه خان همدرد پر كاروان د عطاء محمد نور د اوباشانو بريد وښوده چي د شوراى نظار وطن پلورونكي او خائني ډلي شرارتونه انتهاء ته رسېدلي، نور نو هغه وخت رارسېدلى چي افغان مظلوم ولس بايد د دغي خائني ډلي له شرارتونو وژغورل شي، ټول مجاهدين په ځانگړې توگه د حزب اسلامي مؤمن مجاهدين دا دنده لري چي هم په سياسي ډگر كي او هم په نظامي ډگر كي د دې مفسدي او منافقي ډلي ټغر ټول كړي، تر څو چي دا مفسدين له خپلو بدمعاشيو او بدمستيو نه وي غورځول شوي په افغانستان كي نه صلح او امنيت راتلى شي، نه جگړه پاى ته رسېدى شي او نه د پرديو د لاسوهنو مخنيوى كېدى شي، دا د پرديو مزدوران دي، هغو بهرنيو هېوادونو د اجيرو جنگياليو په توگه استخدام كړي چي خپلي گټي ئې په افغانستان كي د جگړو له دوام سره غوټه كړې، هغه ايران د دوى تر شا ولاړ دئ چي تل ئې د اسلامي امت په ضد د اسلام او اسلامي امت له دښمنانو سره لاس يو كړى، تل ئې مسلمانان له شا په خنجر وهلي، د اسلامي خلافت په ړنگولو كي ئې د صليبي يرغل ملتيا وكړه، نن هم له تهران د همداسي بل ستر خيانت كركجن غږ اورو، د تهران رافضي مشران سپيني ماڼۍ ته وړانديز كوي چي كه عراق ته خپل فوځونه ولېږي نو ايران ئې مرستي او ملگرتيا ته چمتو دئ، پرون ئې د عراق او افغانستان په نيولو كي د امريكا ملگرتيا وكړه، خاتمي، رفسنجاني، خرازي او نورو چارواكو په ډېري بې شرمۍ سره ويل: كه د تهران مرسته نه وى نو امريكا افغانستان او عراق په دومره آسانۍ سره نشو نيولى!! همغه خبره چي پرون خاتمي كوله نن ئې حسن روحاني كوي!!

پر جمعه خان همدرد دا خائنانه بريد د مزار شريف په ښار كي، د هغو بدمعاشانو او اوباشانو له لوري شوى چي د پوليسانو درېشۍ ئې پر تن وې، له بريد وروسته د شوراى نظار غړو په فيس بوك كي د جمعه خان همدرد د وژل شوو محافظينو عكسونه خپاره كړي او ترې لاندي ئې ليكلي: څلور تروريستان مو جهنم ته ولېږل!! او دا هغه ژبه ده چي د ايران سرسپارلي جاسوسان او سپېره مبلغين ئې د داعش، سوري مبارزينو، افغاني او پاكستاني طالبانو او مجاهدينو په ضد كاروي!!

شوراى نظار په انتخاباتو كي خپله ماته د حزب اسلامي په دريځ او اقداماتو پوري تړي، انگېرنه او ادعاء ئې دا ده چي حزب اسلامي او كرزي په گډه او د يوې پټي توطئې له لاري د عبدالله د رأيو شمېر د مخكني دور په پرتله نږدې يو نيم مليون راكم كړ، دا پر خپل سپېره مخ كلكه څپېړه گڼي، لېون وزمه اقداماتو ته ئې هڅولي، انتباه ئې دا ده چي دا ماته به د دې ډلي پر بوى ناك تابوت آخري مېخ ثابت شي، خبره ئې د مظاهرو او غرونو ته د ختلو له گواښونو واړوله او دا دئ د خپلو رقيبانو د بې مروته او غدارانه ترور مخكني اسلوب ته ئې مخه كړه، إن شاء الله دوى ته به ډېر ژر ثابته شي چي د شرارت او بدمعاشيونو پايله به ئې څومره توره او سپېره وي.

افغان ولس او د ولس په درد دردمنو كړيو ته اطمئنان وركوو چي مجاهدين د جگړي د پاى ته رسېدو او په خپلواك او آزاد افغانستان كي د ملت د خوښي اسلامي حكومت قائمېدو په لار كي هري قربانۍ ته چمتو دي، ټولو هغو افغانانو ته چي غواړي زموږ جنگ ځپلى هېواد له دې دردناك حالت ووځي، د يووالي، ورورۍ، گډ كار او د شر او فساد ځواكونو په خلاف گډ دريځ غوره كولو بلنه وركوو.

حزب اسلامي افغانستان

1/4/1393

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
Would love your thoughts, please comment.x
()
x