د دعا لپی له اوښکو ډکی – نظم

محمد حسن مستغفر

پاکه ربه ستا په لاره می روان کړه
د جنت تر ښکلی داره می روان کړه

له بی کیفه عباداتو نه می خلاص کړه
په سلګو ستا تر درباره می روان کړه

په څراغ د اوښکو توره شپه د ژوند کی
ستا د رحم تر سهاره می روان کړه

تاند قلم او سپینه توره را نصیب کړه
او عمل ته له شعاره مې روان کړه

په دنیا د ملنګانو ژوندون راکړه
أو د پاک هدف په لاره می روان کړه

چی په خپلو وینو رنګ و تاته درشم
د منصور په دود تر داره می روان کړه

“مستغفر” په عاجزۍ له رب نه غواړی
ستا تر پاک ښکلی دیداره می روان کړه