افغانستان

حيات الله حيات د ننګرهار والي وټاکل شو

نن ټکی اسيا (دوشنبه، ۲۴ غویی ۱۳۹۷): د ننګرهار د والي ګلاب منګل له استعفا وروسته د ګډ حکومت ‏مشر اشرف غني د هلمند والي حيات الله حيات د ننګرهار د والي په توګه ټاکلی دی.‏

د ګډ حکومت سرچينې وايي، چې حيات د سيمه‌ ييزو ارګانونو په وړانديز د اشرف غني له لوري د ننګرهار ‏والي ټاکل شوی دی.‏

ټاکل شوې، چې حيات به په لنډو ورځو کې د ننګرهار ولس ته وروپېژندل شي، خو تر اوسه دا نه ده ‏روښانه، چې حکومت د هغه پر ځای د هلمند لپاره څوک ټاکلي دي.‏

حيات الله حيات له تېرو څو کلونو راهيسې د هلمند او تر هغه وړاندې د ميدان وردګو والي و.‏

په هلمند کې له تېرې اوږدې مودې راهيسې د حيات الله او د هلمند د ځينو وکيلانو ترمنځ ناندرۍ او ‏شخړې روانې وې او دواړو لوريو پر يو بل ډول ډول تورونه لګول.‏

حيات ويل، چې زورواکي پر مخالفينو پوستې پلوري او په امنيتي ليکو کې يې خپل خلک ټاکلي، خو په ‏ملي شورا او ولايتي شورا کې د هلمند د خلکو استازو بيا حيات په بې کفايتۍ تورناو او له حکومته يې د ‏هغه د ګوښه کولو غوښتنه کوله.‏

حيات د ننګرهار د خوږياڼو ولسوالۍ دی، خو تر اوسه دا نه ده روښانه، چې هغه به په ننګرهار کې د خلکو ‏ارزوګانې پوره کړای شي او که دی به هم د نورو واليانو په څېر له څه مودې وروسته استعفا ته اړ او يا هم ‏ګوښه شي.‏

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
Would love your thoughts, please comment.x
()
x