د بیت المقدس ناوې / بسمل

شاعر : مولانا محمد علیم بسمل

ځه!! ښه ده، چې يې تللی له دنیا صلاح الدینه
چې نه يې اوس زمونږ غوندې، رسوا صلاح الدينه

پړونی مو له بامه د چورلکو شمال وړی
را پاتې نه دی پت، عزت، حيا صلاح الدينه

د بيت المقدس ناوې ښامار ډولۍ کې يووړه
چې نور به خدايزده څومره شو رسوا صلاح الدينه

چې ټرمپ د حرمينو د خادم په تیلو پايي
نو چا ته سترګې واړوي اقصی صلاح الدينه؟!!

بسمل د لېوني په څېر هر ځای کې وهل کېږم
مجرم يمه د فکر په ګناه صلاح الدينه