fbpx

ترکي استخبارات: د اردوګان د ترور کېدو پلان په اړه معلومات ترلاسه کړي

نن ټکی اسیا (یکشنبه، ۳۰غويي، ۱۳۹۷ل): د ترکيې استخبارات وايي، چې د هغو معلوماتو په اړه پلټنه او تحلیل کوي، چې د ولسمشر رجب طیب ‏اردوګان د ترور په اړه ترلاسه شوي دي.‏

ټاکل شوې، چې اردوګان نن بوسنیا او هرسک ته سفر وکړي او د ترکي استخباراتو د معلوماتو له مخې ځينې ترکانو په دغه هېواد کې د اردوګان د ترور ‏پلان جوړ کړی دی.‏

د ترکيې اناضول خبري اژانس ليکلي، چې ترکي استخباراتو داسې معلومات ترلاسه کړي، چې د مقدوينې ښار يو شمېر ترکانو پلان جوړ کړی، چې د ‏ختيځې اروپا هېوادونو ته د سفر پر مهال اردوغان ووژني.‏

اناضول وايي، چې ترکي استخباراتو په دې اړه پلټنې پيل کړي، خو د پېښې د کره ځای، د ترور د کړنلارې او ټاکلي وخت په اړه يې معلومات نه دي ‏خپاره کړي.‏

په ورته وخت کې د ترکيې د ولسمشرۍ ماڼۍ وياند بکر بوزداغ ويلي، چې بوسنيا ته د اردوګان سفر پر خپل ټاکلي وخت ترسره کيږي.‏

بوزادغ په خپل ټويټ کې ويلي، چې دوی هم د ولسمشر اردوګان د ترور په اړه معلومات ترلاسه کړي، خو ولسمشر له مرګه نه وېرېدونکی انسان دی او ‏له خپل ټاکل شوي پلانه به په شا نه شي.‏

د ولسمشرۍ ماڼۍ وياند ويلي، چې اردوګان د ټولو ګواښونو، شومو پلانونو، دسيسو او ټولو ستونزو سربېره د خپل ټاکلي هدف پر لور روان دی او دغه ‏ګواښونه او دسيسې د هغه پر مسير اغېز نشي کولای.

avatar
  ګډون وکړئ  
خبرتیا غوښتل د