تصویر؛ له خواله رسنیو

پکتیا: د بهرنیانو هوايي برید کې د یوې کورنۍ شپږ غړي وژل شوي

نن ټکی اسیا (یکشنبه، ۶غبرګولي، ۱۳۹۷ل): پکتیا کې د سیدکرم ولسوالۍ اوسېدونکي وايي، تېره شپه په هوايي برید کې د یوې کورنۍ شپږ غړي وژل شوي دي.

بهرنیو ځواکونو تېره شپه د دې ولسوالۍ په کوهسین سیمه کې د خلکو پر کورونو بمبار کړی، چې د ماشومانو په ګډون يې د یوې کورنۍ شپږ غړي وژلي دي.

د پکتیا چارواکي هم په سیمه کې د هوايي برید پخلی کوي، خو دعوه کوي چې شپږ تنه طالبان وژل شوي دي.

د پکتیا د امنیه قومندانۍ ویاند سردارولي تبسم وايي، برید د «کشفي معلوماتو» پر اساس د بهرنیو ځواکونو له لوري شوی دی.

بهرنیانو تر اوسه په دې تړاو څه نه دي ويلي.

دا په داسې حال کې دی چې د وري میاشتې په نیمايي کې د کندوز په دشت ارچي کې د خونړۍ ملکي مرګ ـ ژوبلې پړه یوه نیمه میاشت وروسته ومنل شوه.

یاده دې وي بهرنیو ځواکونو د روان کال یوازې په لومړیو دریو میاشتو کې نږدې ۱۲۰۰ هوايي بریدونه کړي دي، چې ډېری زیان يې ملکي وګړو ته رسېدلی دی.

avatar
  ګډون وکړئ  
خبرتیا غوښتل د