پنځو ولایتونو کې هيڅ نوماند نوم لیکنه نه ده کړې

نن ټکی اسیا (شنبه، ۱۲غبرګولي، ۱۳۹۷ل): د ټاکنو کمیسیون مسؤلین وايي چې د نوماندانو لپاره د نوم لیکنې د یوې اوونۍ په تېرېدو لا هم په پنځو ولایتونو کې هیڅ نوماند خپل نوم نه دی لیکلی.

د سرچینې په وینا، په غزني، کاپیسا، تخار، کندوز او جوزجان کې تر اوسه پورې پارلماني او د ولسوالیو د شوراګانو ټاکنو ته هیڅ نوماند خپل نوم نه دی لیکلی.

د دوی په خبره په دې ټولو ولایتونو کې د نوم لیکنې ځنډ، خپل علتونه لري، خو په ډېرو کې يې ټاکنیز دفترونه د خلکو له اعتراضونو سره مخ دي.

په غزني کې له یوې نیمې میاشتې راهیسې د ټاکنو کمیسیون دفتر تړل شوی او په اړه يې تر اوسه هیڅ اقدام نه دی شوی.

په کندوز کې د نا امنۍ او ګڼو نورو علتونو له امله د رایه ورکوونکو لپاره هم نیم مرکزونه بشپړ تړلي پاتې دي.

د ټاکنو کمیسیون د معلوماتو له مخې تر اوسه پورې په ټول هېواد کې ۱۵۰۵ تنو نوماندانو پارلماني او ۱۲۵۱ تنو د ولسوالیو شوراګانو لپاره نومونه لیکلي دي، چې ۲۳۶تنه يې ښځې دي.

د شنونکو په باور روان وضعیت ته په کتو پر ټاکنیزه پروسه ولسي باور صفر ته په ښکته کېدو دی.