مشرانو جرګه: د نا امنیو اصلي لامل بهرنیان دي

نن ټکی اسیا (دوشنبه، ۱۴غبرګولي، ۱۳۹۷ل): په هیواد کې د نا امنیو بې ساري زیاتېدل، او د ملکي مرګ ژوبلي ډېریدلو د مشرانو جرګې غړي اندېښمن کړي، او وایي د روان امنیتي وضعیت اساسي عامل بهرنیان دي.

د سناتورانو په وینا، امنیتي وضعیت ورځ تربلې خرابیږي، د پلازمینې په ګډون هیڅ ځای خوندي نه دی.

دوی وایي، سره له دې چې له بهرنیانو سره امنیتي تړون د امنیت را وستلو په موخه لاسلیک شوی، خو امنیتي وضعیت د هرې ورځې په تېرېدو لا پسې کړکیچن کېږی.

د مشرانو جرګې د شنبې ورځې آزاد بحث په هیواد کي پر روانو ناامنیو ورټول و. سناتورانو وویل، د روانې نا امنۍ اصلي لامل بهرنیان دي چې ځیني ترهګرې ډلې د بهرنیانو له وسایطو او امکاناتو په استفادې پیچلي ترهګریز بریدونه په کار اچوي.

د سناتورانو اشاره د داخله وازارت پر نوي ودانۍ هغه برید ته وه چې څو ورځي وړاندي د داعش ډلي لسو وسلوالو په پیچلی او مرموز ډول ترسره کړ، د چارواکو په وینا د برید کوونکو وسلې او وسایط ټول بهرني او د لوړ کیفیت وو.

د دولتي سرچینو په خبره،  که څه هم برید تلفات نلرل یوازي د ترهګرو په وژلو سره پای ته ورسول شول. خو دې کار خلک پر بهرنیانو شکمن کړي دي.

فضل هادي مسلمیار د مشرانو جرګې رئیس

بلخوا د مشرانو جرګې رئیس فضل هادي مسلمیار په ننګرهار کې د صفردوه قطعه د امریکایانو شخصي ملیشه وبلله او په وینا یې د هغوی خپلسري عملیات ټول د امریکايی ځواکونو په امر ترسره کیږي، د ده په خیره افغان دولت ورباندي خبر هم نه وي.

مسلمیار دا څرګندوني وروسته له هغه کوي چې څو ورځي وړاندي د ننګرهار په چپرهار کې ځانګړو ځواکونو د شپنیو عملیاتو پرمهال د سیمه ایزو پولیسو د قومندان په ګډون د مسلمیار د کورنۍ 9 تنه غړي ووژل او 8 نور یې ټپیان کړل.

avatar
  ګډون وکړئ  
خبرتیا غوښتل د