شعـــــرونه

غزل: د سولې، د اوربند، خبرې کیږي په وطن کې

جلال امرخېل

د سولې، د اوربند، خبرې کیږي په وطن کې
راووځئ، د ژوند خبرې کیږي په وطن کې

ته راشه او د زلفو تار زما له ګوتې تاو کړه
د زړونو د پیوند خبرې کیږي په وطن کې

زما د لاهوتي سندرو مستې هنګامې دي
که ستا په سپین مړوند خبرې کیږي په وطن کې

ته غوږ شه په ممبر د محبت کیسه شروع شوه
ته غوږ شه، څه د پند خبرې کیږي په وطن کې

د واړه شهیدانو ارماني روحونه ناڅي
له جنګه د سوګند خبرې کیږي په وطن کې

په داغ داغ د کابل د زړه روانې تبصرې دي
په زخم د هلمند خبرې کیږي په وطن کې

په سترګو کې مې اوښکې د خوښۍ راغلې جلاله
عجبې څه د خوند خبرې کیږي په وطن کې

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
Would love your thoughts, please comment.x
()
x