د استقلال څادر

عرفان الله عرفاني

وشلېدۀ ټولېږي د اشغال څادر
اغوندي هېواد داستقلال څادر

پېغلو، ملاليو خامک کړئ دی
نلري جوړه دا نړۍ وال څادر

تاو کړلو زلميو له سرو ځينې
ډک دی له دهشته د قتال څادر

توره د تيارو شړۍ به ټوله کړي
وبه غوړوي سپين د هلال څادر

کړي آذان د فتحې پر منبر باندې
ګران طالب اغوستی د بلال څادر

تا چې پر اوږو را اچولی دی
ښکاري د ايوب او د ابدال څادر

نشي پټېدی پکې د وخت شيطان
پېژني هر څوک د خر دجال څادر

تښتي ځان يې منډې ته جوړ کړی دی
غرب لاس کې نيولی د زوال څادر

راشه (عرفاني) ته يې لږ وګوره
تاته مې راوړئ کليوال څادر