په جده ښار کې د علماوو د متوقعې غونډې په اړه!

د اسلامي همکارۍ سازمان ودانۍ - جده

نن ټکی اسیا – سرلیکنه:

په پام کې ده چې سبا د سعودي عربستان په جده ښار کې د افغان غمیزې په اړه د علماوو یوه مذهبې غونډه جوړه شي.

په یاده غونډه کې به راغونډ شوي علماء له شرعي اړخه په افغانستان کې روانه جګړه څیړي او په اړه به یې پریکړه صادروي.

دا بیله خبره ده چې ولي تر ۱۷ کلونو وروسته د جدې د غونډې برخوال علماء دا مسؤلیت حس کوي چې له ۳۷ هیوادونو څخه سره راټول او د افغان جګړې په اړه اظهار نظر کوي.

که د جدې د علماوو د غونډې انګیزه واقعا هم مذهبي او شرعي وي نو هغوی باید د اسلامي امت د مذهبي حامیانو او مدافعینو په حیث ۱۷ کاله وړاندې هغه مهال د دغسې یوې غونډې جوړه ولو تابیا کړې وای چې کله جورج ډبیلو بوش د متحده ایالاتو د وخت د جمهور رئیس په توګه پر افغانستان پوځي یرغل وکړ او هغه ته یې د صلیبي جګړې عنوان ورکړ.

هماغه مهال جورج بوش ټولې نړۍ ته په صراحت اعلان وکړ چې په دې صلیبی جګړه کې دې یا د دوئ (امریکا) و یا هم د دوئ د مخالفینو په خوا کې ودریږي!.

خو دا چې تر اوسه پوري د جدې د علماوو د غونډې موقف او د افغانستان د روانې جګړې په اړه يي پریکړه لا نه ده شوې نو دهغې د موثریت او نه موثریت او همدا راز واقعیت او عدم واقعیت په اړه یې څه ویل تر وخت وړاندې خبره ده.

که واقعا هم د جدې د غونډې برخوال علماء د یوه شرعي مسؤلیت له مخې سره راټولیږي او د افغانستان د روان وضعیت په اړه یې فیصله هم له کوم بهرني اغیز پرته فقط د مذهبي مسؤلیت پربناء وی یقینا چې اغیز به یې د افغانستان په وضعیت مثبت او افغانانو ته هم قابل قبول وي.

او که خدای مه کړه د یادې غونډې د انعقاد لامل د شرعي مسؤلیت په ځای بهرني فرمایش وي او مذهب ورکې هسي د یوې ابزارې وسیلې په حیث کارول کیږي بیا به یې حتما د افغانستان پر وضعیت منفي اغیز ډیر خطرناک او افغانستان به له مزید بحران او بي ثباتي سره مخ کړي.

وبه لیدل شي چې په بروکسل کې د افغانستان د وضعیت په اړه د ناټو د پوځي غونډې ترڅنګ به د جدې د دیني علماوو وروستۍ پریکړې او پایلې څه وي ؟

تبصرې (2)

  • زموږ افغانانو یوازنۍ نه بلکه لومړنۍ هیله داده چه د کنفرانسونو یا کاغذبادونو یا هری ممکنی لیاری مو په وطن کی رښتینې سوله او وروری رامنځته شی البته د عزت او کرامت په رڼا کی.
    امّا د سعودی په ابتکار!!! د سولی!! د کنفرانس!! په هکله فقط یو دوه درې لنډ ټکی:
    کنفرانس شاید د خواخوږۍ او همدردی او مرستی په نیت وی، کنفرانس شاید د یو جدّی تصمیم په اساس وی، کنفرانس شاید د امریکې د پلانونو یوه برخه نه وی، خُلاصه کنفرانس به کنفرانس وی، د نتیجې د څرنګوالی په هکله ئې د قضاوت څخه د ډډی په ترڅ کی فقط دا یوه افغانی- انسانی درنه پوښتنه د کنفرانس د کوربه د سرپرستانو او سربرایانو څخه:
    پوښتنه د کنفرانس د زمین او زمان سره اړه نلری
    راته غوږ شی د کنفرانس آشپزانو!
    درې کاله مخکی د سورئې او عراق او زموږ د وطن د مهاجرتی څپو په جریان کی چه اروپا ئې د بیری او وحشت سره مخامخ کړه، د آلمان صدراعظمی د بیزو لور په عامه رسنیو کی د خپل خیرن ستونی څخه دا خیرن ږغ را وایست چه:
    د خلیج عربی ثروتمند هیوادونه چه ځانونه مسلمانان هم بولی حتی د سلو مهاجرینو د منلو استعداد نلری او ټول مسلمان او عرب مهاجر مخ پر اروپا را وبهېده.
    اې د سعودی فاسدو حُکامو!
    پدې هر څوک پوهېږی چه زموږ د وطن د جنګ او سولی اصلی ټېکه داران او تجاران نور خېټور کسان دی او تاسی ئې فقط ددې پیشو بازیو لپاره استخدام کړی یاست. پدې لیاره کی ستاسی د حتمی یا احتمالی بریالیتوب!!حدس او ګومان زموږ افغانانو وظیفه نده بلکه د دردېدلو افغانانو فریاد تاسی لوی کمیسو خېټورو ته دادی چه که نورو افغانانو ته پخپل هیواد کی د کار او روزګار زمینه نه شی برابرولای نو لږ تر لږه خو دومره رحم ولری چه همهغه میشت افغانان چه په شاقه کارونو لګیا او خپلو بچانو ته یوه ګوله حلاله روزی لاسته راوړی له خپل هیواده مه باسی او اجازه ورکی چه همهلته ستاسی په وطن کی په کار بوخت وی. زموږ وطن ته که همدا نن هم سوله راشی، اقتصادی ستونزی مو ډېری ژوری حتی دومره ژوری او ځوروونکی دی چه تریخوالی ئې د جګړې تر تریخوالی په کمه ندی بناً د مسلمانی توقع خو نه درنه کیږی خو که کولای شی د انسانیت پخاطر زموږ دا مظلومانه ږغ واوری، البته پوهېږو چه تاسی د یو ډېر وړوکی کار د اجراء اجازه هم د خپلو انګریزی یهودی او امریکائی بادارانو څخه تر لاسه کوی.

  • الله ج دی دافغانستان مظلوم میلت باندی ورحمیګی ترکله به دا بحران روان یی