د ناټو سرمنشي، ینس سټولټنبرګ

سټنولنټبرګ: د ناټو هدف د مذاکرتو له لارې د جګړې ختمول دي

نن ټکی اسیا (چهارشنبه، ۲۰چنګاښ، ۱۳۹۷ل): د ناټو عمومي منشي ینس سټولنټبرګ وايي په افغانستان کې د ناټو د پوځي حضور هدف دا دی چې وکولی شي دا جګړه د مذاکراتو له لارې پای ته ورسوي.

هغه د ناټو د سرمشریزې تر پیل وړاندې له ازادي راډيو سره په خبرو کې وویل، دوی د سولې د هڅو ملاتړي دي او د نمونې په توګه يې د اختر اوربند یاد کړ.

سټولنټبرګ وویل، دوی د افغان حکومت له لوري د سولې اړوند تمایل ستايي او د افغان حکومت په مشرۍ د سولې د هر ډول حرکت ملاتړي دي.

د ناټو له لوري د افغان ځواکونو د تمویل په برخه کې تېره ورځ هم، د امریکا ولسمشر ډونالډ ټرمپ د ناټو په تړون کې د امریکا له لوري د پیسو ډېره برخه لګول نا انصافي بللې وه.

هغه لیکلي و: «د امریکا متحده ایالات تر بل هر هېواد پر ناټو ډېر لګښت کوي، دا له انصافه لرې او د منلو نه‎ ده.»

خو د ناټو عمومي منشي وايي په تېرو څلورو کلونو کې د ناټو اروپايي شریکانو او کاناډا ۸۷ میلیارده ډالره لګولي، چې ټول يې په دفاعي چارو لګول شوي دي.

یاده دې وي د ناټو په دې ناسته کې به د افغانستان په اړه پر دریو مسائلو خبرې وشي، د افغان ځواکونو مالي ملاتړ، د افغان ځواکونو پوځي ملاتړ او د افغان سولې اړوند هڅې.

په دې غونډه کې ډاکټر عبدالله عبدالله او محمد اشرف غني دواړه برخه وال دي، چې له هېواده په بېلابېلو الوتکو کې خوځېدلي دي.

د نن ټکی اسیا موبایل اپلیکیشن
avatar
  ګډون وکړئ  
خبرتیا غوښتل د