نېکولسن؛ د بهرنیانو عمومي قومندان

طالبان: نېکولسن د داعش د «غټولو» هڅه کوي

نن ټکی اسیا (سه شنبه، ۲زمري، ۱۳۹۷ل): طالبان وايي په افغانستان کې د بهرنیانو عمومي قومندان هڅه کوي داعش ډلګۍ لویه معرفي کړي.

جنرال نېکولسن پرون رسنیو ته وویل، چې دوی د داعش پر وړاندې د طالب سرتېرو هڅونه کوي، چې طالبان يې د داعش لپاره تبلیغاتي زور بولي.

طالبانو په خپره کړې اعلامیه کې ويلي، هغه د دې لپاره دا څرګندونې کوي چې « یو ډول د داعش لپاره د اسلامي امارت د مجاهدینو په ضد تبلیغاتي توکي برابر کړي او مرسته ورسره وکړي.»

دوی په ننګرهار او جوزجان کې هم له داعش سره د امریکا مستقیمې همکارۍ یادې کړي او د هغو پېښو یادونه يې کړې، چې د داعش پر وړاندې په جګړه بوخت طالبان پکې بمبار شوي دي.

«امریکايي جنرال دې د داعش په وړاندې د چا جګړه نه هڅوي بلکې په ننګرهار او جوزجان کې دې له داعشیانو څخه د هوايي، لوجستيکي، استخباراتي او مطبوعاتي ملاتړ او پړسولو څخه لاس واخلي.»

طالبانو د اعلاميې په پای کې ولس ته په ډاډ کې د امریکا په څېر د داعشي جنګیالیو د ځپلو ژمنه تکرار کړې ده «اسلامي امارت خپل اولس ته ډاډ ورکوي، لکه څرنګه يې چې د اشغالګرو په مقابل کې جهاد او د آزادۍ مبارزې ته ملاتړلې همدا ډول به له امریکايي ملاتړ سره سره د داعش په نامه فتنه هم له منځه وړي او ملت به ترې ژغوري. ان شاءالله»

داعش هغه ډلګۍ چې له پیدا کېدو سره جوخت د ملي شورا ګڼو غړو، کارپوهانو او د چارو شنونکو د افغانستان، امریکا او پاکستان ګډه لوبه یاده کړه.

avatar
  ګډون وکړئ  
خبرتیا غوښتل د