د فتحو اختر

شاعر: عبدالقديم نظام

چې په را تلو دې پيل کړو بل د فتحو باب اختره

زړونه ټکور کړه او تعبير مو شه د خواب اختره

چې اسماعيل مو له چړې بيا مرۍ روغه راوړي

د وخت خليل هم په ازمون کې کړه کامياب اختره

چې مو و مرستې ته جِبرِيل له آسمانونو راځي

بِشارت راوړه د يو داسي انقلاب اختره

د خوار مظلوم ولس پر سر د شفقت سيوری شه

او پر مُلحدو مُفسدينو شه عذاب اختره

دلته پر هر کور غم خپور کړی تور څادر د ماتم

ته د خوښۍ په نور ترې پورته کړه نِقاب اختره

دلته له زړونو پورته کيږي د آهونو لمبې

پرې ووروه باران د رحم، شه سَحاب اختره

دا د نفرت شپه کړه سبا په پلوشو د مينې

نظام ته داسي سباوون راوړه آفتاب اختره