سکاټ مېلر، د حکومت له دواړو مشرانو سره جلا جلا لیدلي

نن ټکی اسیا (دوشنبه، ۱۲وږي، ۱۳۹۷ل): د بهرنیانو نوي قومندان سکاټ مېلر د ګډ حکومت له دواړو مشرانو سره جلا جلا لېدلي دي.

ګلخانې او سپېدار ماڼیو په جلا جلا خبرپاڼو کې ویلي، چې له هغه يې مننه کړې او هغه ته يې د بریا لاسونه لپه کړي.

د محمد اشرف غني د لیدنې په اړه ویل شوي، چې له مېلر نه يې د دې دروند مسؤلیت اخیستو مننه کړې او د بریا هیله يې ورته کړې ده.

عبدالله عبدالله هم د بریا د هیلې تر څنګ هغه ته د دې مسؤلیت د ور په غاړه کېدو مبارکي ورکړې.abdullah-milar

مېلر دواړو ته د همکارۍ سینه ډبولې او ټينګار يې کړی چې د سولې لپاره به نظامي فشار زیات کړي، هغه چې نېکولسن هم پکې پوره وس وکړ.

نېکولسن له ۲۰۱۶م کال راهیسې د بهرنیانو عمومي قومندان و، چې د تېر کال په وروستیو کې د ټرمپ د نوي ستراتېژي له پیل سره يې په هوايي بریدونو کې د تېرې ټولې جګړې په پرتله زیاتی راوست.

د دې ستراتېژي له اعلان وروسته، د غوڅ ملاتړ ماموریت د معلوماتو پر اساس هره میاشت پر افغان خاوره حد اقل څلور سوه او حد اکثر د اوو سوو شاوخو بمونه غورځول شوي دي.

۵۷ کلن مېلر د امریکا په هاوای ایالت کې زېږېدلی او په افغانستان کې يې د امریکايي ځانګړو ځواکونو چې په شپنیو عملیاتو او ملکي تلفاتو کې نوم لري، قومنده هم ترسره کړې.

طالبانو هغه ته د سولې پر خبرو د ټينګار بلنه ورکړې او په وینا يې باید له تېرو ناکامو قومندانانو يې زده کړې چې له «افغان ولس سره پنجه نرمه نه کړي.»

avatar
  ګډون وکړئ  
خبرتیا غوښتل د