روسیه: امریکا په افغانستان کې پوره ناکامه شوې

نن ټکی اسیا (پنجشنبه، ۱۹تلې، ۱۳۹۷ل): روسیه وايي امریکا په افغانستان کې له اوولس کاله جګړې سره سره پوره ناکامه شوې ده.

د روسيې د بهرنیو چارو وزارت ویاندې ماریا زاخرووا کریمیا کې رسنیو ته وویل، امریکا په افغانستان کې له «ترهګرۍ» سره مبارزې او د مخدره موادو د قاچاق په مخنیوي کې پاتې راغلې ده.

هغې وویل، دلته شته ګواښونه موږ ټول ځوروي او په وینا يې په افغانستان کې ټول ګواښونه په پوره زور سره پیاوړي کېږي.

روسیه امریکا په افغانستان کې د داعش په را پیداکولو، تمویل او ملاتړ تورونوي، چې هڅه کوي د منځنۍ اسیا هېوادونو لپاره يې د ګواښ په توګه وکاروي.

په کابل کې د روسيې استازي ضمیر کابلوف څو ځلې ټینګار کړی چې دوی لا هم د هغو چورلکو په اړه معلومات نه لري چې داعش جګړه مارو ته مهمات او مرسته ور رسوي.

امریکا اوولس کاله وړاندې د ۲۰۰۱م کال د اکتوبر په اوومه پر افغانستان یرغل وکړ، چې تر اوسه يې د دوی د سرچینو په حواله د ناټو تر ۳۵۰۰ ډېر عسکر له لاسه ورکړي او ۲۱۷زره ملکي افغانان وژل شوي دي.

avatar
  ګډون وکړئ  
خبرتیا غوښتل د