سپنتا: د «تروریزم» پر ضد نړیواله «اجماع» له منځه تللې

نن ټکی اسیا (پنجشنبه، ۲۶تلې، ۱۳۹۷ل): د ملي امنیت شورا پخوانی سلاکار ډاکټر رنګین دادفر سپنتا وايي د «تروریزم» پر ضد په افغانستان کې د نړیوالو جوړه شوې «اجماع» له منځه تللې.

هغه چې پرون (چهارشنبه، ۲۵تلې) د سولې شورا له لوري برابره شوې ناسته کې خبرې کولې وویل د طالبانو او سیمې د هېوادونو تر منځ اړیکي او د امریکا او طالبانو تر منځ مخامخ خبرې دا په ډاګه کوي چې دلته د «تروریزم» پر ضد را ټول شوي غړي سره پاشل شوي دي.

هغه چې د افغان ولس پر ضد د نړیوالو جګړه مارو ائتلاف د «تروریزم پر ضد اجماع» بولي، د له منځه تلو لپاره يې څو دلایل وړاندې کړل.

سپنتا د خپلو خبرو د دلیل په ډول دا یادونه هم وکړه چې د امریکا او طالبانو تر منځ خبرو کې د افغانستان حکومت اصلاً شریک نه دی.

هغه د روسي یرغل پر وخت جینوا خبرو ته په اشارې وویل چې هلته د وخت حکومت شریک و، خو اوس پرې خبر هم نه دی.

سپنتا وویل، روس له طالبانو سره خبرې کوي، ایران له طالبانو سره خبرې کوي، چین او نور حساب پرې کوي، امریکا ورسره مخاخ په خبرو بوخته ده، په وینا يې دا په ډاګه کوي چې اوس نړیواله ټولنه پر پخواني دریځ نه ده پاتې.

هغه حکومت پر دې هم ملامت کړ، چې د سولې غونډې کوي، تبلیغات کوي خو پر دې سربېره «زهرجنه ژبه کاروي.»

د حامد کرزي د واکمنۍ او اوسني حکومت ځينې څېرې وروسته له هغه د سولې اړوند خبرو کې پرلپسې څرګندونې کوي، چې د زلمي خلیلزاد او طالبانو تر منځ خبرې وشوې.

طالبانو په خپره کړې اعلامیه کې د زلمي خلیلزاد او خپلو استازیو تر منځ د خبرو تایید وکړ، یادونه يې کړې وه چې دا ډول خبرې اترې به دوام پیدا کړي.